भांगरभूंय | प्रतिनिधी
भावंडांनो,
ह्या संवसारांत वेगवेगळ्या सभावाचीं भावंडां आसात. कांय भावंडां सदांच हांसतीं, खेळटीं रावतात. कांय जाणां बडबडीं आसतात, जाल्यार कांय जाणांक बडबड करपाक आवडना. तीं ओगीच रावतात. आपल्याच विचारांनी घुस्पल्लीं आसतात. कांय हाणां इश्ट इश्टिणी बदलाक पुस्तकांचो सांगात धरून वाचनांतूच वेळ घालयतात. कांय जाणां कोर्दीवयल्या बावल्यां सारकीं आसतात. पूण एक सांगू भावंडांनो, तीं कशींय आसूं, तांकां उमेदी दवरपाक, एकामेकांच्या सांगातान खेळोवपाक, वावुरपाक तुमी तांकां मजत करूंक जाय. आनी तांकां सदांच आनंदीत, खोशयेन दवरपाक जाय. वागतलीं न्हय तशीं तुमी? शाब्बास! हांव हें सांगतना, म्हाका एका म्हान मनशाची याद येता. ते भुरगेपणांत कोणाकडेनूच चड उलयनासले, आपले भितरूच आसताले. घरांत आनी शाळेंत लेगीत तशेच वागताले. ताच्या आवय बापायक ताच्या सभावगुणाचो हुस्को जातालो. पूण तुमकां म्हत्वाची गजाल सांगतां भावंडांनो, हो आपलेच चिंतनांनी वावुरतालो खरो पुणून संवसारांतल्या खंयच्याच गजालीचेर खोलायेन चिंतन करतालो. आनी ह्याच सभावगुणांक लागून त्या भुरग्यान तरणेपणांत जायते सोद लायले. संशोधनां केली आनी संवसारांत एक म्हान विज्ञानीक म्हूण आयज मेरेन अज्रंवर उरले. तो विज्ञानीक म्हळ्यार आमी जाची 14 मार्चाक जयंती पाळटात. ते म्हान विज्ञानीक जावन आसात अलबर्ट आयनस्टायन.
भावंडांनो, सातत्यान कश्ट घेयात, अभ्यास आनी आत्म बळग्याच्या नेटार साबार संशोधनां करीत आपल्या सिद्धांता वरवीं अणुबॉम, रॉकेटा खातीर संवसारांतली जायतीं गुपितां जाणीं सुटावीं केलीं, त्या म्हान विज्ञानिकाची, संशोधकांची म्हणल्यारच अलबर्ट आयनस्टायन हांची याद आमी 14 मार्चाक काडुया.
एका पुस्तकांतल्यान तांकां गणीत आनी विज्ञानाची गोडी लागली. पूण ते परिक्षेक बसपाक सदांच भिताले. मुखार तांचो हो भंय गलो आनी तांणी गणिताचें शिक्षण घेवपाक सुरुवात केली. तांणी 21 वर्सां पिरायेचेर गणीत विशयांत दोतोरकी मेळयली. मदल्या काळांत नोकरी मेळूंक नाशिल्ल्यान तांकां वायट दिसांक फुडो करचो पडलो. तरी एके सुवातेर ’कारकुनाची’ नोकरी करून आपलीं संशोधनां चालू दवरलीं. अशी खर जिद्द तांचे मदीं आशिल्ली.
भावंडांनो, विज्ञान हें संवसाराच्या उदरगती खातीर आसा आनी न्हय संवसाराच्या इबाडा खातीर, हो संदेश दियत पुराय संवसाराक सोबीत रितीन दवरपा खातीर अलबर्ट आयनस्टायन हांणी कितल्याश्याच शास्त्रज्ञांक पत्रां बरयलीं आनी ते खातीर खासा वावरत रावले. 1921 वर्सा पदार्थ विज्ञान शास्त्रांतल्या संशोधना खातीर तांका 4500 डॉलर्सांचो नोबेल पुरस्कार फावो जालो. आपल्या इनामांची आनी पुरस्काराची रक्कम धर्मीक संस्थानाक दान करपी, सैममोगी, पियानो वादक, गणितज्ञ आयनस्टायनाचीं 14 मार्चा जयंती मनयतात. ते निमतान तांची याद काडून आमी भावंडांनी तांकाय नमळायेन वंदन करूया आं…
बरें तर..
उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
