भांगरभूंय | प्रतिनिधी
भांगरभूंय । प्रतिनिधी
पणजी : गोंय सरकारान ‘सरकार तुमच्या दारी’ ह्या उपक्रमा खातीर 2021 आनी 2022 ह्या दोन वर्सांत 3.75 कोटी रुपया खर्च केल्यात. फेब्रुवारी 2026 त फोंड्यां जाल्ल्या ह्या उपक्रमाचें अजून बील मेळूंक ना. जाल्यार जनता दरबार उपक्रमाचेर सामान्य प्रशासन खात्यान कसलोच खर्च करूंक ना. मुख्यमंत्री डॉ. प्रमोद सावंत हांणी विधानसभेंत दिल्ले लेखी जापेंतल्यान ही म्हायती मेळ्ळ्या. हे विशीं आमदार विजय सरदेसाय आनी कार्लोस फेरेरा हांणी तारांकीत प्रस्न उपस्थीत केल्लो.
जापेंत दिल्ले म्हायती प्रमाण, 2021 त ‘सरकार तुमच्या दारी’ हो उपक्रम आठ कडेन चालीक लायिल्लो. हातूंत काणकोण, कोलवाळ, दिवचल, पेडणें, साश्टी, मुरगांव, सांखळी, दोना पावला, कुडचडें, हळदोणें, शिरोडें हांचो आस्पाव आशिल्लो. हातूंत सांखळे जाल्ले कार्यावळींत सगल्यांत चड 40.30 लाख रुपया खर्च जाल्लो. जाल्यार काणकोणचे कार्यावळींत 37.51 लाख, कुडचडें आनी शिरोड्याचे कार्यावळी खातीर 31.11 लाख रुपया खर्च जाल्ले.
ते भायर दोना पावला, पेडणें आनी हळदोणें वाठारांत जाल्ले ‘सरकार तुमच्या दारी’ उपक्रमा खातीर दरेकी 31.08 लाख रुपया खर्च जाले. मुरगांवचे कार्यावळी खातीर 29.32 लाख रुपया खर्च जाले. जाल्यार दिवचले जाल्ले कार्यावळींत 9.32 लाख रुपया खर्रच जाले. सगल्यांत उणें म्हणल्यार 2.64 लाख रुपया कोलवाळचे कार्यावळींत खर्च जाले. 2022 त नेत्रावळी आनी सांगें वाठारांत हे कार्यावळीचें आयोजन केल्लें. दोनूय कडेन मेळून 70.02 लाख रुपया खर्च जाल्ल्याचें जापेंत म्हणलां.
‘जनता दरबारा’चें सात खेपे आयोजन
गोंयांत 2023 त 7 खेपे ‘जनता दरबारा’चें आयोजन केल्लें. ‘जनता दरबार’ आनी ‘सरकार तुमच्या दारी’ ह्या दोनूय उपक्रमा खाला मांडिल्लो समस्या संबंदीत खात्या कडेन तत्काळ धाडिल्ल्यो. हे उपक्रम सरकाराच्यो येवजण्यो लोकां मेरेन पावोवपा खातीर चालीक लायिल्ल्यो. उपक्रमांचो नियाळ, ऑडीट करूंक ना, अशी म्हायती मुख्यमंत्र्यान दिल्ले जापेंतल्यान मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
