भांगरभूंय | प्रतिनिधी
मुख्यमंत्र्याची विधानसभेंत म्हायती
भुरगीं नाशिल्ल्यान 18 शाळा विलीन
नव्यो बिगर सरकारी 19 शाळा सुरू
भांगरभूंय । प्रतिनिधी
पणजी : फाटल्या 6 वर्सांत 60 मुळाव्यो सरकारी शाळा बंद पडल्यात जाल्यार 18 शाळा विलीन केल्यात. ह्या काळांत सरकारान वट्ट 19 बिगर सरकारी मुळाव्या शाळांक परवानगी दिल्या. तातूंत 52 टक्के खाजगी मुळाव्या शाळांचो आस्पाव आसा, अशी लेखी जाप मुख्यमंत्री डॉ. प्रमोद सावंत हांणी दिल्या.
विधानसभेच्या पटलार केपेंचे आमदार एल्टन डिकोस्टा हांच्या प्रस्नाक मुख्यमंत्री तशेंच शिक्षण मंत्री डॉ. सावंत हांणी लेखी जापेंत ही म्हायती दितना सांगलें, 2020-21 ते 2025- 26 मजगती एकूय विद्यार्थी नाशिल्ल्यान 60 मुळावो शाळा बंद पडल्यात जाल्यार 18 शाळांनी सरासरी फक्त 2 ते 3 विद्यार्थी आशिल्ल्यान त्यो विलीन केल्यात.
सगल्यांत चड 11 शाळा 2020- 21 त बंद पडल्यात जाल्यार अंदूं 2025- 26 त 8 मुळाव्यो शाळा बंद पडल्यात. दिवचल म्हालांत 11 शाळा बंद पडल्यात, फोंडें म्हालांत 7, काणकोण म्हालांत 10 शाळा बंद पडल्यात.
मजगतीं, 2020- 21त आठ शाळांनी 21 भुरगीं, 2021- 22 त तीन शाळांनी 7 भुरगीं, 2022-23 त दोन शाळांनी 5 भुरगीं, 2023- 24 त चार शाळांनी 12 भुरगीं आनी 2025- 26 त एके शाळेंत 3 भुरगीं आशिल्ल्यान ह्यो शाळा विलीन केल्यात. 2024- 25त एकूय शाळा विलीन जावंक ना.
ह्या काळा मजगतीं सरकारन नव्या 19 मुळाव्या शाळांक परवानगी दिल्या. तातूंतल्यो 9 शाळा ह्यो सरकारी अनुदानीत आसात जाल्यार 10 शाळा खाजगी आसात. सगल्यांत चड 7 शाळांक फोंडें म्हालांत परवानगी दिल्या. दिवचल आनी बार्देस म्हालांत दरेकी 5, साश्ट म्हालांत 4, सत्तरी म्हालांत 2 आनी धारबांदोडें, केपें, मुरगांव, सांगें आनी पेडणें दरेकी एके शाळेक परवानगी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
