म्हाविद्यालयांनी गणभेस सक्ती नाकाः एनएसयुआयची मागणी

भांगरभूंय | प्रतिनिधी

पणजीः म्हाविद्यालयांत उच्च शिक्षण घेवपी विद्यार्थ्यां खातीर गणभेस सक्ती नाका अशी मागणी एनएसयूआय आनी गोंय विद्यापीठ विद्यार्थी मंडळान केल्या. हे संबंदीं दोनूय संघटणांच्या शिश्टमंडळान विरोधी पक्षाचे फुडारी युरी हांकां मेळून हे संबंदीं निवेदन सादर केलें. संघटनांच्यो मागणी योग्य मंचाचेर मांडपाची विनवणी तांणी आलेमांव हांकां केली. ह्या वेळार पदव्युत्तर शिक्षण घेवपी विद्यार्थ्यांक 65 टक्के हाजीरी आनी सायबर एज येवजण परतून सुरू करप अशो मागणीय केल्ल्यो.
संघटणांनी दिल्ल्या निवेदनांत म्हणलां, महाविद्यालयात शिकपी विद्यार्थी प्रौढ आसात. शाळेच्या जिणेंत तांणी गणभेस वापरिल्लो. अशे परिस्थितींत म्हाविद्यालयांनीय गणभेस सक्ती केल्यार विद्यार्थ्यांच्या वैयक्तीक आनी अभिव्यक्ती स्वातंत्र्याक आडमेळीं येवंक शकतात. सक्तीच्या गणभेस धोरणाक लागून खाशेलो गणभेस घेवचो पडटा. हाका लागून विद्यार्थ्यांचेर अर्थीक भार वाडत आसा. राज्यांतल्या दमट हवामानाक लागून प्रमाणित गणभेस त्रासदायक थारूंक शकतात. अर्दवेळ काम करपी लोकांकय गणभेस उपेगी पडनात. स्वतंत्र विचारांक आदार दिवपा खातीर गणभेस सक्तीचे आसूंक फावना.
हाचे भायर कॉलेजींतल्या विद्यार्थ्यांक लॅपटॉप मेळोवपा खातीर सायबर एज येवजण परतून सुरू करची. तशेंच वेंचून आयिल्ल्या विद्यार्थी मंडळाक 2 लाख रुपया मेरेन निधी दिवप, मासिक पाळीच्या वेळार बायल विद्यार्थ्यां खातीर सुटी धोरण सुरू करप, म्हाविद्यालयांत सद्याचें कॅम्पस प्लेसमेंट सेंटर चालीक लावप, पुनर्मूल्यांकन करपा खातीर अध्यादेश ओए-25 परतून सुरू करप, अभियांत्रिकी विद्यार्थ्यांवयलो ताण उणो करपा खातीर सत्र परिक्षे उपरांत कांय विसव काळ दिवप अशीय मागणी केल्या.