भांगरभूंय | प्रतिनिधी
पणजीः राज्य सरकार जी डिपॉझिट रिफंड येवजण (डीआरएस) सुरू करपाचो यत्न करता ताका लागून राज्यांतली कोयराची समस्या सुटावी जातली असो दावो करतात. पूण हाका लागून ही समस्या वाडटली. येवजणेंतल्यो उणाव पयस करपा खातीर सरकारान संघटने कडेन चर्चा करची.
हे खातीर हे येवजणेची अंमलबजावणी एक वर्स फुडें धुकलची अशी मागणी संघटनेचे अध्यक्ष क्लिंटन वाझ हांणी केल्या. शेनवारा पणजेंत जाल्ले पत्रकार परिशदेंत ते उलयताले. ह्या वेळार बेलन गोम्स, समृद्धी हेगडे देसाय आनी तेजश्री कुंभार हे कार्यावळीक हाजीर आशिल्ले.
डीआरएस येवजणेक लागून रस्त्यांचेर उडोवपी कोयर उणो जातलो अशें वाझ हांणी सांगलें. पूण संघटनेन केल्ल्या सर्वेक्षणां प्रमाण रस्त्यांचेर उडयल्ल्या कोयरांत मुखेलपणान प्लास्टीक, ओलो कोयर, सॅनिटरी पॅड, डायपर, रबर, कपडो हांचो आस्पाव आसता. डीआरएसांत ह्या कोयराचे वेवस्थापन करचे ना. देखून रस्त्यांचेर जावपी कोयर उणो जावपाचो दावो चुकीचो आसा. डीआरएसा वरवीं फकत चड मोलाचो कोयर एकठांय करतले. हातूंत अॅल्युमिनियम, कंवची वा प्लास्टीक बाटली हांचो आस्पाव आसतलो.
सध्या थळाव्यो कंपनी व्हड मोलाचो कोयर एकठांय करतात अशें तांणी सांगलें. पूण डीआरएस सुरू जाल्यार ह्या क्षेत्रांत एकाच कंपनीची मक्तेदारी निर्माण जातली. तशेंच असंघटीत क्षेत्रांतल्या 3 ते 4 हजार कोयर एकठांय करप्यांच्या रोजगाराचेर ताचो परिणाम जातलो. सॅनिटरी पॅड, डायपर सारकिल्ल्या वस्तूं खातीर ही येवजण पयलीं सुरू करची. येवजण चालीक लावचे पयलीं सगल्या भागधारकां कडेन उलोवणी करप गरजेचें आसा. आमच्या संस्थेंत 20 वर्सां ह्या क्षेत्रांत काम करपी लोक आसात. येवजणेंत गरजेचे बदल करपाक आमी मजत करूंक शकतात. सगळ्यांनी एकठांय येवन राज्यांतली कोयराची समस्या सोडोवप शक्य आसा.
डीआरएस येवजण चालीक लायल्यार बाटली, कॅन आनी हेर प्लास्टीक व्यापिल्ल्या वस्तूंचे दर वाडटले. हे पयशे परत दितले. पूण एका विशिश्ट केंद्रांत वचून रांकेत उबे रावून पयशे परत मेळोवपाक कितले लोक तयार जातले हो प्रस्न आसा. रिफंड करपाक जाय आशिल्ल्या वस्तूचेर आशिल्लो बार कोड इबाडलो जाल्यार पयशे कशे परत दितले हाची जाप दिवची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
