भांगरभूंय | प्रतिनिधी
होंड्यां 750 कील मास जप्त; चालकाक घेतलो ताब्यांत
वाळपय: गोंय- बेळगांव मजगतच्या चोर्ला घांट वाठारांतल्यान बेळगांव मार्गान गायच्या मासाची जावपी बेकायदो येरादारी अजूनय थांबिल्ली ना, हें परतून एकदां स्पश्ट जालां. फाटल्या एका वर्सांत अशे तरेच्यो घडणुको घडिल्ल्यो आसून पुलीस आनी थळाव्या लोकांचे जागरुकतायेक लागून कांय प्रकरणां उक्तडार आयल्यात आनी कारवायूय केल्या. पूण हे कारवायेक भियेनासतना बेळगांव वाठारांतल्यान गोंयांत गायचें मास हाडपाचे प्रकार सुरूच आसात.
काल (शुक्रारा) सकाळीं बेळगांव वाठारांतल्यान गोंयांत येवपी एका भाजयेची येरादारी करपी पिकपीतल्यान (केए 23 बी 3542) गायचें मास हाडपाचाे प्रकार उक्तडार आयलो. हे घडणुकेक लागून वाठारांत एकूच खवदळ पडलो. होंडा हांगा जागरूक नागरिकांनी दुबावीत पिकप आडावन तपासणी केली तेन्ना तातूंत सुमार साडेसातशें कील गायचें मास आशिल्ल्याचें दिसून आयलें. हाची म्हायती वाळपय पुलिसांक दिले उपरांत पुलिसांनी ताकतिकेन घडणूक थळार धांव घेवन पिकप चालक सादीक बी. नाईकवाडी (बेळगांव कर्नाटक) हाका ताब्यांत घेतलो.
हे विशीं मेळिल्ले म्हायती प्रमाण बेळगांव वाठारांतल्यान गोंयांत व्हड प्रमाणांत गायच्या मासाची येरादारी जायत आशिल्ल्याचें पयलीं सावन मुखार येत आसा. वेगळे वेगळे पद्दतीन गायच्या मासाची येरादारी गुप्तपणान जायत आशिल्ल्याचें दिसून येता. फाटल्या एका वर्सांत अशे तरेच्यो सुमार सात घडणुको घडल्यात. गोमोगींनी हे विशीं पुलिसांक गंभीरतायेन लक्ष दिवपाची मागणी हाचे पयलीं केल्ली. तरी लेगीत हे प्रकार थांबूंक नाशिल्ल्यान तिडक उक्तायतात.
शुक्रारा सकाळीं घडिल्ले हे घडणुकेंत होंडा वाठारांतल्या लोकांचे नदरेक संबंदीत पिकपीतल्यान तांबडे रगत रस्त्यार पडत आशिल्ल्याचें दिसून आयलें. रोखडेंच नागरिकांनी त्या पिकपीचो फाटलाग करून चालका कडेन चवकशी केली तेन्ना चालकान योग्य जापो दिवपाचें टाळिल्ल्यान दुबाव आनीक वाडलो. थळाव्यांनी वाहनाची तपासणी करपाचो यत्न केलो तेन्ना चालकान अरेरावीची भास वापरिल्ल्याचें थळाव्यांनी सांगलें.
उपरांत वाळपय पुलिसांक म्हायती दिली. पुलिसांनी घडणूक थळार धांव घेवन पिकपीची तपासणी केली तेन्ना पिकपीच्या फुडल्या भागांत पोतयांनी भरिल्लें सुमार 750 कील गायचें मास सांपडलें. ताचेर भाजी आनी फळांच्यो पोतयो दवरून हो म्हाल लिपोवपाचो यत्न केल्लो. हो प्रकार उक्तडार आयले उपरांत थळाव्या नागरिकांनी खर तिडक उक्तायली. भाजी येरादारीच्या नांवा खाला गायच्या मासाची येरादारी जायत आशिल्ले खातीर लोकांनी निरशेवणी उक्तायल्या.
होंडा वाठारांतल्या नागरिकांनी दिल्ले म्हायती प्रमाण संबंदीत पिकप बेळगांव सावन गोंयांत नेमान भाजी आनी फळांची येरादारी करीत आसता. ताका लागून ह्या वाहनांतल्यान सेगीत बेकायदेशीरपणान गायचें मास हाडटात आसुये असो दुबाव उक्तायतात. मजगतीं, पुलिसांनी पिकप जप्त करून चालक सादीक नाईकवाडी हाचे आड कायदेशीर कारवाय केल्या.
जप्त केल्लें 750 कील मास पशू वैजकी अधिकाऱ्या कडल्यान तपासणी करून ताचो विलो लायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
