भांगरभूंय | प्रतिनिधी
मडगाव : मिराबाग बंधार्या आड मडगांवच्या लोहिया मैदानार नागरिकांनी निदर्शनां सुरु केल्लीं. मात, मडगांव पालिके कडल्यान परवानगी घेवंक नाशिल्ल्यान कायदो सुवेवस्था राखपाक पुलिसांनी निदर्शकांक घडणुके सुवातेवेल्यान ताब्यांत घेतले.
बंधार्याक जावपी विरोध आतां आनीक खर जाता. राज्य सरकार ह्या प्रस्ना कडेन लक्ष दिनाशिल्ल्यान थळाव्यांनी बंधार्याच्या सुवातेवेलें आंदोलन आतां मडगांवच्या लोहिया मैदानार सुरु केल्लें. हे सुवातेर सासश्टींतल्या समाजीक कार्यकर्त्यांनीय आंदोलनाक फाटबळ दिवपा खातीर गर्दी केल्ली. सकाळ सावन नागरिकांनी लोहिया मैदानार बसकण मारून सरकारा आड घोशणां सुरू आशिल्लीं. मिराबाग बंधार्याक विरोधा खातीर विधानसभेंत घोशणा केल्ली. उपरांत मडगांव पुलिसांनी लोहिया मैदानार आंदोलन करपाची परवानगी आसा काय ना हें दाखोवपाची मागणी केली. मात, मडगांव पालिकेकडेन अर्ज केल्ल्यान तांचे कडल्यान परवानगे विशीं प्रतिसाद दिवंक नाशिल्ल्याचें सांगलें. ह्या वेळार घडणुके सुवातेर दाखल जाल्ले दक्षीण गोंय खासदार विरियातो फर्नांडिस हांणीय पालिका अधिकार्यां कडेन चर्चा केली. तशेंच लोहिया मैदानावेल्या आंदोलनाची सगली जापसालदारी आपूण स्विकारतां. दुसर्या खंयच्याच कार्यावळी खातीर अर्ज येवंक नासल्यार परवानगी दिवपाची मागणी केली. हाचे उपरांतूय प्रशासना कडल्यान परवानगी दिवंक ना. उपरांत पुलिसांनी कायदो आनी सुवेवस्था कायम राखपा खतीर लोहिया मैदाना वेल्यान वचपाक सांगलें. मात निदर्शकांनी आपूण हे सुवातेवेल्यान वयचे ना अशी भुमिका घेतिल्ल्यान प्रतिबंधात्मक कारवाय म्हणून पुलिसांनी निदर्शकांक ताब्यांत घेवन मडगांव पुलीस स्टेशनार व्हेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
