भांगरभूंय | प्रतिनिधी
मिराबागच्या प्रस्तावीत धरणाक विरोध करपी आंदोलकांनी तकटो दाखोवन केलो निशेद
पणजी: गोंय विधानसभेच्या अर्थसंकल्पीय अधिवेशनाचो पयलोच दीस सामको वादळी आनी नाटकी थारलो. अधिवेशनाचे सुरवातेक राष्ट्रगीत जाले उपरांत काम सुरू जातांच मिराबागच्या प्रस्तावीत धरणाक विरोध करपी आंदोलकांनी अनपेक्षितपणान विधानसभेचे गॅलरींतल्यान तकटो दाखोवन निशेद नोंद केलो. ह्या प्रकाराक लागून सभाघरांत बरोच बोवाळ जालो आनी विधानसभेचे सुरक्षा वेवस्थेचेर गंभीर प्रस्न निर्माण जालो. आंदोलकांचे हे कृती उपरांत मुख्यमंत्री डॉ. प्रमोद सावंत हांणी तिडक उक्तायत संबंधितांक रोखडीच अटक करपाची मागणी केली.
मजगतीं, आंदोलन करपी चवगांक ताब्यांत घेतिल्ल्यान, तांकां पास कोणें दिले, हाची चवकशी सुरू आसा.
हाचे उपरांत मिराबाग बंधार्याच्या मुद्यावेल्यान सभाघरांत सत्ताधारी आनी विरोधकां मदीं बरोच बोवाळ जाल्लो पळोवपाक मेळ्ळो. आमदार विजय सरदेसाय आनी उदकास्रोत मंत्री सुभाष शिरोडकार हांचे मदीं ह्या विशयावेल्यान शाब्दीक झुज रंगलें. मिराबागचे आंदोलक २७ दीस रस्त्याचेर आसूनय सरकार ओगी कित्याक आसा? असो प्रस्न करीत आमदार विजय सरदेसाय हांणी उतरांचो हल्लो करून लोकांच्या भावनांची दखल घेवंक नाशिल्ले खातीर तिडक उक्तायली. मंत्री शिरोडकार हांणी विरोधकांचेर गंभीर आरोप करतना म्हणलें, राजकी फायद्या खातीर विरोधक आंदोलकांक मुखार करून प्रकल्पां विशीं संभ्रम निर्माण करतात.
मात, डॉ. सावंत हांणी सरकाराची बाजू सांबाळीत स्पश्ट करतना म्हणलें, जलस्रोत विभागाच्या इंजिनीअर्सांनी ह्या प्रकल्पाचें म्हत्व आनी तांत्रीक बाजू थळावे तशेंच पंचायतीक वेवस्थीत समजावन सांगलां. आंदोलकांनीय स्वता तांची भेट घेतिल्ली, तशेंच ह्या प्रकल्पाक लागून कोणाचेंच यक्तीक वा मालमत्तेचें लुकसाण जावचें ना, अशें ठाम आस्वासन आपणें तांकां दिल्लें अशें मुख्यमंत्र्यांनी ह्या वेळार सांगलें.
सभागृहाचे सभापती गणेश गांवकार हांणीय ह्या वादांत आपली भुमिका स्पश्ट केली. हो प्रकल्प तांच्या स्वताच्या सांवड्डें मतदारसंघांत आयिल्ल्यान तांणी थळाव्यांच्या भावनांची दखल घेतल्या. सावड्डें मतदारसंघांतलीं घरां उदका पोंदा वयचीं असो तांचो तांचो वा सरकाराचो हेत ना, अशें सांगतनाच तांणी विभागाक ह्या प्रकल्पाचें सविस्तर सादरीकरण लोकां मुखार मांडपाचे निर्देश दिल्यात.
दुसरे कडेन, आदले मंत्री दीपक पाऊसकार हांणी सरकाराचेर टिका केल्या. प्रस्तावीत मिराबाग बंधारो प्रकल्पाचो थळाव्यांक कसलोच फायदो जावचो नाशिल्ल्यान हो प्रकल्प फकत दिल्ली लॉबी आनी उद्देगपतींच्या बर्या खातीर राबयता असो आरोप तांणी केलो.
ह्या विशयाचेर ओगी राविल्ले खातीर तांणी सांवड्डेंच्या आमदारांच्या राजीनाम्याची मागणी केल्ल्यान पुराय मतदारसंघात बोवाळ जाल्ल्याचें तांणी सांगलें. आंदोलकांनी आतां जलस्रोत विभागाचे कार्यकारी अभियंता गिप्सन मिरांडा हांच्या निलंबनाची मागणी लावन धरल्या.
एकंदर, मिराबाग प्रकल्पाचो वाद आतां फकत रस्त्याचेर उरनासतना विधानसभेच्या हौद्यांत पाविल्ल्यान येवपी काळांत हो संघर्श आनीक घर जावपाची चिन्नां दिसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
