भांगरभूंय | प्रतिनिधी
व्हडल्या जात्रां खातीर नियोजन, जागृताय ही गरजेचीच.
शिरगांवची जात्रा 21 एप्रीलाक. पोरूं खेटाखेट जावन स जाणांक मरण आयिल्लें, तर 50 वयर जखमी जाल्ले. सगल्यांक हालोवन सोडपी, अशी ही दुर्घटना आशिल्ली. हे जात्रेक हजारांनी लोक येतात, होमखणांतल्यान वचपी धोंडांचोय तितलोच आंकडो आसता. म्हणटकच अंदूं भाविकांचे सुरक्षे खातीर आनी गर्देचें नियोजन करपा खातीर तयारी सुरू जाल्या. मुख्यमंत्री डाॅ. प्रमोद सावंत, थळावे लोकप्रतिनिधी आनी अधिकाऱ्यांनी रस्तो रुंदीकरण आनी हेर सगल्या कामांची काल पळोवणी केली. येत्या 15 मार्चाक धोंडांचीय बसका देवळाचे समितीन आपयल्या. जात्रेक येवपी सगल्यांनी शिस्तींत वागल्यार दुर्घटनेची शक्यताय उणी आसता. वावड्यांचेरुय खात्री केले बगर विस्वास दवरूंक फावना. आतां दुर्घटना घडिल्ली थंयचो रस्तो रुंद करतात. भाविकां खातीर हेर सुविधाय तयार करतात. धोंड, तांचीं घरचीं आनी हेर भाविकांनी स्वता वांगडाच हेर लोकांचीय जतनाय घेवंक जाय. कितेंय वायट जावपाक गर्देंतल्या एकल्याचें पसून बेशिस्त वागप पुरो, हें कोणें विसरूंक फावना.
साळांत गड्यांक वेळार येवपाचें आनी वचपाचें नेम केल्यात. गर्देचेर नियंत्रण दवरपाक, शिस्त लागपाक हें बरें. कुडण्यां गड्यांक तर अंदूं भायल्यांक प्रवेश ना, अशें जाहीर केल्लें. कारण गडे पळोवपाक येवप्यां मदल्या कांय जाणांची बेशिस्त वागतात, मस्ती करतात. पयर म्हापश्यां होळयेचे पार्टेक कांय तरणाट्यांनी केस्तांव केलें. गाडयो फोडल्यो. हालींच्या वर्सांनी पियेवप आनी दादागिरी, मारामारी करप हें सदचेंच जालां. हांवें कितेंय केल्यार म्हजो लोकप्रतिनिधी पुलिशेक फोन मारून म्हाका सोडयतलो, हाची खात्री आशिल्ल्यान हें घडटा. जात्रा, फेस्तां हीं धर्मीक, पवित्र. तांकां खत लागतलें, अशें कांयच करपाक फावना.
सुरक्षीत जात्रा हीच खरी श्रद्धा. भावने परस संयमांत भक्ती आसची. शिस्तींतूच उत्सव मनोवचो. देशांत हाचे पयलींय खेटाखेट जाल्या. प्रयागराजात 2013 त कुंभमेळ्यांत रेल्वे स्टेशनाचेर गचमुड्डी जावन 30 जाण मेल्ले. जोधपूरांत 2008 त चामुंडादेवी मंदिरांत वावडी उडून 200 परस चड भाविक सोंपिल्ले. साताऱ्यांत 2005 त काळुबाई जात्रेंत उज्याचे वावडेक लागून 300 परस चड लोक मेल्ले. हिमाचल प्रदेशांत नैनादेवी देवळांत 2008 त 140 भाविक चिड्डून सोंपिल्ले. हज यात्रेंत 2005 त सावदींत 2000 हाजींक मरण आयिल्लें. तर 1990 त थंयच 1400 भाविक चिडल्ले. नायजेरियांत इस्टरा वेळार व्हडली दुर्घटना जाल्ली. वावडी, आबूज जावप, अशीर मार्ग, एकदम गर्दी जावप, नियोजनांत चुकी, शिस्त पाळप ना हीं ह्या दुर्घटनांचीं कारणां. व्हडल्या जात्रां खातीर नियोजन, जागृताय ही जायच.
पोरूं होमखण हें फक्त धोंडांचें. हेरांचें थंय काम कितें, असो एक विचार व्यक्त जाल्लो. जात्रेक येवंनाकात, अशें सांगप योग्य जावचें ना. मात होमखण घालता, थंय लागीं फक्त धोंडाकूच घेवंक जाय. लोकांक येवपाक, वचपाक वेगळे मार्ग आसल्यार बरे. टायम स्लाॅट जाय. धोंडांक न्हांवपाक, देवळांत दर्शन घेवपाक, अग्नीदिव्य, भाविकांक देवळांत वचून दर्शन घेवपाक थारावीक वेळ दवरप शक्य आसा? सीसीटीव्ही कॅमेरे, ड्रोन, अॅम्बुलन्स, पुलीस, प्रशिक्षीत आपसेवक, वैजकी कर्मचारी घडणूक थळांचेर आसूंक जाय. उणीच दोन तरी भलायकी उपचार केंद्रां जाय. जात्रेंत तळयेर न्हांवप, धोंडांचे नाचप, देवीचो कळस, होमखण पेटोवप, अग्नीदिव्य हें सोशल मिडिया वा चॅनलाचेर लायव्ह करीत, तशेंच जात्रे थळाचेर, अस्नोडें बसस्टॅण्डाचेर व्हडली स्क्रीन घालीत जाल्यार गर्दी, धक्काबुक्की इल्ली तरी उणी जातली. अशीर वांटो रुंद, मेकळ्यो करप गरजेचें. कारण दुकानां परस भाविकांची सुरक्षा म्हत्वाची.
शिस्त, संयम, योग्य नियोजन हेंच जात्रेचें बळगें. कितेंय जाल्यार कसलीच चूक नासतना जात्रा, उत्सव बदनाम जाता, हाचें भान प्रत्येक भाविकान दवरल्यार बरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
