भांगरभूंय | प्रतिनिधी
आयज सावन अर्थसंकल्पी अधिवेशन
पयल्याच दिसा मांडटले अर्थसंकल्प
अधिवेशनांत गाजतलें कलम 39 ए
भांगरभूंय । प्रतिनिधी
पणजी : विधानसभेचे अर्थसंकल्पी अधिवेशन आयज शुक्रार सावन सुरू जाता. 27 मार्च मेरेन चलपी ह्या अधिवेशनांत आयज पयल्याच दिसा मुख्यमंत्री डॉ. प्रमोद सावंत 2026- 27 अर्थीक वर्साचो अर्थसंकल्प सादर करतले. मुख्यमंत्री सभाघरांत सांजेच्या 4.30 वरांचेर अर्थसंकल्पी भाशणाक सुरवात करतले. फुडल्या वर्सा विधानसभा वेंचणूक आशिल्ल्यान अर्थसंकल्पांत करवाड करिनासतना कल्याणकारी येवजण्यांची खैरात आसतली.
प्रस्नजापेच्या सत्रान आयज सकाळीं 11.30 वरांचेर अधिवेशनाक सुरवात जातली. आर्गां ओंपपी आनी परबीं दिवपी थाराव सादर जाले उपरांत मुख्यमंत्री डॉ. प्रमोद सावंत तरेकवार खात्यांचे अहवाल सभाघरांत सादर करतले. कामकाज सल्लागार समितीचो अहवाल सादर जाले उपरांत पुरवणी मागण्यांच्या विनियोग विधेयकाचेर चर्चा जातली. पुरवणी मागण्यांचें विनियोग विधेयक (2025- 26 तिसरी बॅच) संमत जाले उपरांत मुख्यमंत्री अर्थसंकल्प सादर करतले.
मनोहर पर्रीकार हांच्या मरणा उपरांत 2019 त डॉ. प्रमोद सावंत हांणी मुख्यमंत्रीपदाची जापसालदारी स्विकारली. सर्गेस्त मनोहर पर्रीकार हांणी 2019- 2020 वर्साचो अर्थसंकल्प सादर केल्लो. तरी मुख्यमंत्री जाले उपरांत डॉ. प्रमोद सावंत हांणी पुरवणी अर्थसंकल्प सादर केलो. हाचे उपरांत 2020- 21 सावन सेगीत 6 अर्थसंकल्प तांणी सादर केले. अंदू ते कारकिर्दींतलो सातवो अर्थसंकल्प सादर करतले. फुडल्या वर्सा विधानसभा वेंचणूक आशिल्ल्यान ह्या कार्यकाळांतलो तांचो हो निमणो अर्थसंकल्प आसतलो. फुडल्या वर्सा वेंचणूक आशिल्ल्यान अर्थसंकल्पांत येवजण्यांची खैरात आसतली, अशी आस्त आसा.
अर्थसंकल्प मांडले उपरांत अधिवेशनांत सोमार आनी मंगळार अशें दोन दीस अर्थसंकल्पाचेर चर्चा जातली. उपरांत खात्यांच्या मागण्यांचेर चर्चा जातली. अधिवेशनाच्या निमाण्या दिसा मुख्यमंत्री विनियोग विधेयक सादर करतले.
अधिवेशनांत 583 तारांकीत आनी 2348 अतारांकीत प्रस्न आयल्यात. हे भायर आमदारां कडल्यान खासगी विधेयका संबंदांत 15 विधेयकां आयल्यांत. नगरनियोजन कायद्याचें कलम 39 ए रद्द करपाची तजवीज आशिल्ली स्वतंत्र विधेयकां विरोधी आमदारांनी सादर केल्यांत. हीं एकठांय जावन चर्चेक येवपाची आस्त आसा. अधिवेशनांत लक्षवेधी सुचोवण्यो, शुन्य वरा सयत 15 खासगी प्रस्ताव चर्चेक येतले. फाटलें अधिवेशन चालू आसतना युनिटी मॉल प्रकल्पा विरोधात चिंबलाच्या लोकांनी आंदोलन केलें. लोकांच्या आंदोलनाक लागून युनिटी मॉल प्रकल्प दुसरी कडेन स्थलांतरीत करपाचो वेळ सरकाराचेर आयलो. ह्या अधिवेशना पयलीं नगर नियोजन कायद्याच्या कलम 39 ए आड खर आंदोलन जालें. आमदार विरेश बोरकार हांणी आस्वासना उपरांत उपोशण फाटीं घेतलें. कलम 39 ए रद्द करपाची मागणी विरोधक करतले. हें अधिवेशन कलम 39 ए वयल्यान गाजतलें. हे भायर इनफ इज इनफ चळवळी वरवीं आदले न्यायाधीश फेर्दीन रिबेलो हांणी जमीन विक्रीचेर निर्बंध हाडपी विधेयकाचो मसुदो राजकी पक्षांक धाडला. हाचेर आदारीत खासगी विधेयक मांडपाची नोटीस विजय सरदेसाय आनी युरी आलेमांव हांणी दिल्या. ह्या विधेयका विशीं उमळशीक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
