गोंया खातीर काजू मंडळ स्थापन करपाचो प्रस्ताव

भांगरभूंय | प्रतिनिधी

देविया राणे : 10 ते 12 एप्रीलाक कांपालार काजू महोत्सव

भांगरभूंय । प्रतिनिधी

पणजी : गोंयांत काजू मंडळ स्थापन करपाचो प्रस्ताव आसा. सध्या चलपी काजूची अनियंत्रीत पुरवण मंडळ स्थापन केले उपरांत बंद जातली. काजू हो गोंयकारां खातीर इतिहास, दायज आनी पिळग्यान पिळग्यो चलत आयल्ली परंपरा जावन आसा, अशें गोंय रान उदरगत महामंडळाची अध्यक्ष देविया राणे हांणी सांगलें.

गोंय रान उदरगत म्हामंडळ 10 ते 12 एप्रील मजगती कापांल पणजे काजू महोत्सवची चवथी आवृत्ती मनयतलें. ह्या महोत्सवाची म्हायती दितना देविया राणे उलयताली.

काजू फक्त फळूच न्हय. काजूचो दरेका गोंयकारा कडेन विशेश सबंद आसात आनी ह्या कारणाक लागून आमी काजू उद्देगाक उर्बा दितात, अशें राणे हांणी सांगलें.

काजू हो म्हुट्टो वा बीं आसूं, आमचे खातीर तो विशेश आसा. तशेंच काजू पसून तयार जावपी दर्जेदार उत्पादनां देखीक काजू बी आनी फेणी फाटल्यान आमकां लक्ष दिवपाक जाय. काजू महोत्सवा वरवीं सगल्या भागधारकांक चडांत चड लाव आनी प्रसिध्दी मेळोवप हो आमचो हेतू आसा, अशें राणे हांणी म्हणलें.

गोंयांत काजू मंडळ स्थापन करपा विशीं हांवें मुख्यमंत्री डॉ. प्रमोद सावंत हांचे वांगडा चर्चा केल्या. हेर राज्यां देखीक केरळ आनी महाराष्ट्र हांचे कडेन स्वताचें काजू मंडळ आसा. देखून गोंयांतूय अशें मंडळ स्थापन जावचें. हो विशय विधानसभेंतूय मांडटले आनी हे विशीं मुख्यमंत्र्यान आस्वासन दिलां. मंडळ स्थापन जाल्यार सध्या जावपी अनियंत्रीत काजूची पुरवण बंद जातली, अशी म्हायती राणे हांणी दिली.

काजू म्हुट्टो वा काजू बियांची पिकावळ उणीं जावप तशेंच गोंयांत जावपी डुप्लिकेट काजू बियांची पुरवण ह्या गजालींचेर लक्ष दिवन काजूक उर्बा दिवपा खातीर दर वर्सा हो महोत्सव मनयतात. काजू म्हामंडळा वरवीं काजू उद्देग आनी भागधारकांक उर्बा दिवपा खातीर आमी हो विचार चलयला, अशें राणे हांणी म्हणलें. तीन दीस चलपी उत्सवांत थळावे कलाकार सादरीकरण करतले, तीन दीस वेगवेगळे डिजे आसतले, तशेंच फॅशन शो आसतलो, नामनेचे गोंयकार बॅण्डाचें सादरीकरण जातलें, तशेंच राष्ट्रीय कलाकार आपली कला सादर करतले. काजूच्या विवीध विशयाचेर सकाळच्या दिसा तंत्रीक सत्रां जातलीं, अशी म्हायती राणे हांणी दिली.