मंत्री विश्वजित राणे हांच्या घराचेर व्हेल्ल्या मोर्चाची जातली चवकशी

भांगरभूंय | प्रतिनिधी

महसूल सचिव संदीप जॅकीस हांच्या अध्यक्षते खाला सत्यसोदक समिती

पणजीः नगरनियोजन कायद्याचो कलम 39 अ रद्द करपाची मागणी करपी आंदोलना वेळार नगरनियोजन मंत्री विश्वजीत राणे हांच्या दोना पावलच्या घरा व्हेल्ल्या मोर्चाची सरकारा वरवीं चवकशी जातली. महसूल सचीव संदीप जॅकीस हांचे अध्यक्षते खाला सरकारान सत्यसोदक समिती स्थापन केल्या. हे समितीन बेगीनांत बेगीन अहवाल सादर करचो असो आदेश जारी केला.
सत्यसोदक समितीची नेमणूक करपाचो आदेश मुखेल सचीव डॉ. व्ही. कांडावेलू हांणी जारी केलां. दक्षीण गोंय जिल्होधिकारी एग्ना क्लेटस, आयएएस आनी टिकमसिंह वर्मा, आयपीएस हे समितीचे वांगडी आसात. टिकमसिंह वर्मा हे समितीचे वांगडी सचीव आसात. मंत्र्याच्या खाजगी घराचेर मोर्चो काडप अयोग्य आसा आनी ताचेर खर कारवाय जातली अशी शिटकावणी मुख्यमंत्री डॉ. प्रमोद सावंत हांणी दिली. बंगलोचेर मोर्चो व्हेल्ल्या संबंदी विरोधी फुडारी युरी आलेमांव आनी हेरां आड गुन्यांव नोंद केला. पुलीस चवकशी करता आसतना आतां सरकारान सत्यसोदक समिती स्थापन केल्या.
23 फेब्रुवारीचे रातीं आंदोलकांनी दोना पावल हांगाच्या नगरनियोजन मंत्री विश्वजीत राणे हांच्या घराचेर मोर्चो व्हरुन कलम 39 अ रद्द करपाची मागणी केल्ली. पुलिसांनी मोर्चो थांबवपाचो यत्न केलो. तरी लेगीत आंदोलक दुसरे वाटेन वचून मंत्र्यांच्या घरा मुखार बसले. तशेंच आंदोलकांनी मंत्री विश्वजीत राणे हांचे आड घोशणां दिल्यो. हाचे उपरांत तेच रातीं आझाद मैदानाचेर परतून आंदोलक जमले.
सांत आंद्रे मतदारसंघांतलो कलम 39 अ खाला केल्ले झोन रुपांतराचे प्रस्ताव रद्द करपाची मागणी करून आमदार विरेश बोरकार हांणी पाळें शिरदोनच्या थळाव्यां वांगडा पाटो हांगाच्या नगरनियोजन खात्याच्या कार्यालयांत मोर्चो काडिल्लो. तांची मागणी मान्य जावंक ना म्हूण तें दिसभर कार्यालयाच्या भायर बसून रावलें. दुसरे दिसा पुलिसांनी आमदार विरेश बोरकार आनी हेरांक भायर काडले उपरांत आझाद मैदानाचेर आंदोलन सुरू जाले. आमदार विरेश बोरकारान कलम 39 अ रद्द करपाची मागणी करून उपोशण सुरू केले. झोन बदल रुपांतराचे प्रस्ताव रद्द जाले उपरांत विरेश बोरकारान उपोशण फाटीं घेतले. कार्यालयांत व्हेल्ल्या मोर्चा वेळार नगर नियोजन खात्याच्यो फायली चोरल्यात अशी कागाळ पणजी पुलिशेंत दाखल जाल्या.