टॅक्सी ॲपा वयल्यान आजूनय कोफुसांव

भांगरभूंय | प्रतिनिधी

सरकार ॲपाचेर ठाम, टॅक्सी धनयांचो न्हयकार

पणजीः टॅक्सी ॲपा विशीं आजूनय कोफुसांव चल्ला. थळावें टॅक्सीकारांनी ॲपाक सारखोच न्हयकार दिला. पूण सरकार टॅक्सी ॲपाचेर ठाम आसा. सद्या टॅक्सी भाड्याचे दर डिजीटायज करपाचे थारयला आनी हे विशीं सरकार आनी टॅक्सी धनयांची एक समन्वय समिती स्थापन जाला. पूण टॅक्सी ॲपाच्या विशयाचेर अजून मेरेन कसलोच सुटावो येवंक ना.
ॲपा विशीं चर्चा करपा खातीर मुख्यमंत्री डॉ. प्रमोद सावंत हांणी टॅक्सी ऑपरेटर्सांची बसका आपयल्ली. मंत्रालयांत जाल्ले बसकेंत येरादारी मंत्री मावीन गुदीन्हो, पर्यटन मंत्री रोहन खंवटे, कळंगुटचे आमदार मायकल लोबो, साळगांवचे आमदार केदार नायक तशेंच विविध टॅक्सी संघटनेचे पदाधिकारी हाजीर आशिल्लें.
बसके उपरांत उलयतना डॉ. सावंत हांणी ही बसका सकारात्मक रितीन जाल्ल्याचें सांगलें. तांणी ॲपाचो आस्पाव करचो. आमी तांकां बरो दर दितले. सद्या आमी तीन येरादारी खात्याचे अधिकारी आनी 10-12 टॅक्सी संघटनेचे वांगडी आशिल्ले समन्वय समिती स्थापन केल्या. टॅक्सी धनी आपल्यो सगळ्यो समस्या ह्या अधिकाऱ्या मुखार मांडटले. येता ते सोमारा हे समितीची बसका जावन 8-10 दिसा भितर हे सगळे विशय सुटावे जातले, अशी म्हायती मुख्यमंत्र्यान दिली.
फकत गिरायकच न्हय तर टॅक्सीकाराची सुरक्षा, राखण आनी पार्दशकताय हे विशय आमका सुटावे करपाक जाय. हे सगळे विशय सुटावे करपाक टॅक्सी धनी शंबर टक्के सकारात्मक आसात, अशें मुख्यमंत्र्यान म्हणलें.
आमी ॲपाचो केन्नाच आस्पाव करचे नात. पूण आमी टॅक्सी भाड्याचे दर डिजीटायस करपाची मागणी केल्ल्याचे, अखिल गोंय टॅक्सी धनी संघटनेचे अध्यक्ष चेतन कामत हांणी सांगलें.
गोवा मायल्स रद्द करपा खातीर आमी सुचोवणी दिल्या. सद्या येरादारी खात्याचे तीन अधिकारी आनी आमचो आस्पाव आसपी एक समिती तयार केला. हे बसकेत सगळे टॅक्सी धनी हजर रावपाक शकले नात. देखून आमी पयली तांकां विश्वासात घेवन तांच्यो सुचोवण्यो अधिकाऱ्या मुखार मांडटले. दर थळाचेर दर निश्चित करून ते डिजिटायज करपाक जाय. आमका ॲप नाका, अशें कामत हांणी म्हणलें.