भांगरभूंय | प्रतिनिधी
मडगांवः केळशी एका बांयेंत 64 वर्सां पिरायेच्या दादल्याची कूड मेळ्ळी. तांच्या गळ्यांत दोरी गुठलायल्ली आशिल्ली. तियोफिल कार्दोज अशें मरण आयिल्ल्याचे नांव जावन आसा. हो एक खून आशिल्ल्याचो दुबाव आसा. सध्या पुलिसांनी हे प्रकरण ‘असैमीक मरण’ म्हणून नोंद केलां.
मेळिल्ले म्हायती प्रमाण, बिरेस्तारा सकाळीं तांच्या घरा लागसारच्या बांयेत तियोफिल कार्दोजाची कूड मेळ्ळी. गळ्यांत दोरी बांदिल्ली आशिल्ली, तशेंच बांयेत एक कदेलूय मेळ्ळी. थळाव्या लोकांनी कार्डोजाची कूड पळयली आनी रोखडीच कोलवा पुलिसांक म्हायती दिली. पुलिसांनी थंय वचून पळोवणी केली आनी कूड भायर काडपा खातीर उजो पालोवपी दळाच्या कर्मचाऱ्यांक आपयलें.
हो घातपात आशिल्ल्याची शक्यताय थळाव्यांनी उक्तायली. कार्दोज आपल्या भयणी वांगडा रावतालो. फाटल्या कांय दिसां सावन हेर कांय लोक तांच्या घरांत यो-वच करताले अशी म्हायती मेळ्ळ्या.
कोलवा पुलीस निरिक्षक डायगो ग्रॅसिअस हांणी हे प्रकरण असैमीक मरण म्हूण नोंद केला. ह्या प्रकरणांतल्या मरणाचें खरें कारण सोदून काडपा खातीर चवकशी सुरू आसा अशें पुलिसांनी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
