भांगरभूंय | प्रतिनिधी
भांगरभूंय । प्रतिनिधी
पणजी : एखाद्या कर्मचाऱ्याक खात्याच्या चुकीन पगारांतल्यान चड रक्कम गेली आसत जाल्यार निवृत्ती उपरांत ती पेन्शन आनी ग्रॅच्युईटीतल्यांन वसूल करप अयोग्य आसा. न्यायालयान दिल्ल्या निवाड्यांचो संदर्भ दीत निवृत्त दोतोरा कडल्यान वसूल केल्ली 30 लाख 55 हजारांची रक्कम 60 दिसांत परत करपाचे निर्देश गोंय मानवाधिकार आयोगान दिल्या. 60 दिसां भीतर ही रक्कम फारीक केली ना जाल्यार 6 टक्के कळंतरान ही रक्कम भलायकी खात्याक फारीक करची पडटली. भलायकी सचीव आनी भलायकी संचालकांक हे निर्देश दिल्या.
गोंय मानवाधिकार आयोगाचे अध्यक्ष डेस्मंड डिकोस्ता आनी वांगडी प्रमोद कामत हांणी हे निर्देश चवकशी अहवालातल्यांन दिल्या. आपली कसलीच चूक नासताना पगारातल्यांन चड गेल्ली रक्कम पेन्शन आनी ग्रॅच्युइीटींतल्यांन वसूल केली अशी कागाळ डॉ. मिनाक्षी पाणंदीकार, मडगांव हिणें मानवाधिकार आयोगाकडेन केल्ली. ह्या कागाळींत भलायकी खात्याचे सचीव आनी भलायकी संचालक हांकां प्रतिवादी केल्ले. सुनावणी पुराय जाले उपरांत आयोगान चवकशी अहवाल सादर केलो.
कागाळदार डॉ. मिनाक्षी पाणंदीकार हिची नियुक्ती 29 जून 2001 ह्या दिसा ज्युनियर गायनोकोलॉजीस्ट ह्या पदाचेर जाल्ली. 21 नोव्हेंबर 2022 ह्या दिसा तिणें सीनीयर गायनोकोलॉजीस्ट ह्या पदावेल्यान स्वेच्छा निवृत्ती घेतली. 21 वर्सांच्या सेवे उपरांत तिणें स्वेच्छा निवृत्ती घेतली. निवृत्ती उपरांत चुकीच्या पद्दतीन पगार लागू केल्ल्यान 30 लाख 55 हजार 975 रूपयांची रक्कम चड गेली, अशें पत्र तिका लेखा संचालनालयाकडल्यांन आयलें. तिच्या सहमती उपरांत 20 लाख रूपया ग्रॅच्युईटींतल्यांन जाल्यार 10 लाख 55 हजार 975 रूपया पेन्शनातल्यांन वसूल केले. रक्कम वसूल करपा सावन आपणाक सूट मेळची, अशी मागणी तिणें भलायकी संचालकांकडेन पत्र बरोवन केली. तिची मागणी मान्य जाली ना. रक्कम वसूल जाले उपरांत तिणें मानवाधिकार आयोगाकडेन कागाळ केली.
पगारांतल्यांन रक्कम चड गेली, हातूंत कागाळदार दोतराची कसलीच चूक ना. आस्थापन वा सरकारी खात्याच्या चूकीक लागून कर्मचाऱ्याक पगारांतल्यांन चड रक्कम गेली जाल्यार ती पेन्शन वा ग्रॅच्युईटींतल्यांन वसूल करपाचो अधिकार ना. हे संबंदीत कर्मचाऱ्याक त्रासीक थारतात, अशें सर्वोच्च न्यायालयान निवाडे दिल्या. ह्या निवाड्यांच्या आदाराचेर वसूल केल्ली रक्कम परत कर्मचाऱ्याक दिवपाचो आदेश मानवाधिकार आयोगान भलायकी खात्याक दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
