भांगरभूंय | प्रतिनिधी
चार जाण जखमी : १० जाणां आड कागाळ
म्हापशें : बोडगिणी, म्हापश्यां होळये निमतान आयोजीत ‘होळी पार्टी इव्हेंट’ हे विशेश संगीत कार्यावळींत दोन गटां मदीं झगडें पेटलें. हातूंत चार जाण जखमी जाल्यात. १० जाणां आड कागाळ दाखल केल्या. मात पुलिसांनी आजूनय गुन्यांव नोंद करूंक ना.
शौर्य मयेंकार, निकिता कार्व्हालो, क्रिश नावेलकार, दिव्यम मयेंकार हांचो मारपेटींत जखमी जाल्ल्यां मदीं आसपाव आसा. तांचेर म्हापशेंच्या जिल्लो हॉस्पिटलांत उपचार सुरू आसात.
ही घडणूक बुधवारा रातच्या सुमार ८.३० वरांचेर घडली. हे विशीं मेळिल्ले चड म्हायती प्रमाण, बोडगिणीच्या उक्त्या मैदानार होळये निमातन ’होळी पार्टी संगीता’ची कार्यावळ आयोजीत केल्ली. सकाळ सावन सुरू आशिल्ले हे कार्यावळींत बारीक-सारीक झगडीं चालूच आशिल्लीं. थंय तैनात आशिल्ल्या पुलिसांनीय झगडीं मिटयलीं.
मात रातच्या वेळार वयले घडणुके वेळार साळगांव आनी म्हापशेंच्या दोन गटां मदीं वाद जालो. ह्या वादाचें रुपांतर मारामारी जाली.
ह्या संघर्शांत म्हापशेंच्या गटाराचेर बियर बाटल्यांनी हल्लो केलो. हातूंत शौर्य मयेंकार आनी हेर जखमी जाले. जखमींक तत्काळ म्हापशेंच्या उत्तर गोंय जिल्लो हॉस्पिटलांत उपचारा खातीर दाखल केले. म्हापशें पुलिसांनी ह्या प्रकरणांत सुरवातेक चवगांक चवकशे खातीर ताब्यांत घेतिल्ले. मात ह्या तरणाट्याचो मारपेटींत आसपाव नाशिल्ल्याचे समजले उपरांत तांकां सोडले.
मारपेटींत जखमी जाल्ल्यांनी १० जाणां आड पुलिशेंत कागाळ केल्या. मात पुलिसांनी आजूनय ह्या प्रकरणांत गुन्यांव नोंद करूंक ना. मारपेटीची घडणूक घडले उपरांत थळाव्या राजकारण्यांनी घडणुके सुवातेर वचून हें प्रकरण समजिकायेन मिटोवपाचो यत्न केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
