भांगरभूंय | प्रतिनिधी
१७ इराणी बोटी बुडल्यो: ९ देशांतल्या १४ अमेरिकन तळांचेर हल्लो
तेहरान: अमेरिका-इझ्रायल-इराण झुजाचो आयज सवो दीस. वांगडा अमेरिकेन इराणाचेर हल्लो केल्ल्याक शंबर वरां जालीं. आतां मेरेन ह्या झुजांत हजारां परस चड लोकांक मरण आयलां. इझ्रायल आनी अमेरिकेन मेळून इराणाच्यो १७ बोटी बुडयल्यात.
इराणान ताचो प्रतिकार करून मध्य उदेंतांतल्या णव देशांतल्या अमेरिकेच्या तळांचेर हल्लो केलो. मजगतीं इझ्राएलान लेबनॉनांतल्या त्रिपोली हांगाच्या पॅलेस्टायन निर्वासितांच्या शिबिराचेर हल्लो केलो. खबरां प्रमाण हो हल्लो बेद्दावी निर्वासीत छावणींत जालो, जी उत्तर लेबनॉनांतली सगल्यांत व्हड पॅलेस्टिनी निर्वासित छावणी मानतात.
इराणी वृत्तसंस्था ISNA प्रमाण, अशे तरेची कसलीय कृती जाल्यार दक्षीण इस्रायलांत आशिल्ल्या अणुसुत्रांचेर हल्लो करपाक शकता, अशें अधिकार्यान सांगलें.
अमेरिकेन भारतांतल्यान परतपी इराणी युद्धनौकेचेर हल्लो केला
अमेरिकेन बुधवारा भारतांतल्यान परतपी IRIS देना हे इराणी झुजा बोटीचेर श्रीलंके लागसार हल्लो करून ती बुडयली. ह्या हल्ल्यांत आतां मेरेन ८७ इराणी नौसैनिकांक मरण आयलां. ही म्हायती श्रीलंकेच्या सरकारान दिल्या.
अमेरिकेचे संरक्षण मंत्री पीट हेगसेथ हांणी, हिंद महासागरांत अमेरिकेच्या पाणबुडीन इराणी बोटीक टॉर्पेडोन लक्ष्य करून बुडयली. श्रीलंकेच्या नौदलान ३२ जखमी नौसैनिकांक वाटोवन तांकां हॉस्पिटलांत दाखल केल्यात.
बोटीचेर सुमार १८० नौसैनीक आशिल्ले. बेपत्ता लोकांच्या सोदा खातीर सोद आनी बचाव कार्य सुरू आसा. ही इराणी झुजा बोट फाटल्या म्हयन्यांत भारताच्या विशाखापट्टणम हांगा आयोजीत २०२६ च्या आंतरराष्ट्रीय फ्लीट रिव्ह्यूंत भाग घेवन परत येताली.
श्रीलंकेच्या अधिकार्यांनी अल जजीराक सांगलें, बुधवारा सकाळच्या सुमार ६ ते ७ वरां मजगतीं (भारतीय वेळे प्रमाण) मजती खातीर संदेश धाडलो. ही बोट दक्षीण श्रीलंकेंतल्या गाले शारा पसून सुमार ४० सागरी मैल (सुमार ७५ किलोमीटर) पयस आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
