भांगरभूंय | प्रतिनिधी
पणजी: पणजी म्हापालिकेचे वेंचणुके खातीर १६ फेब्रुवारी सावन आचारसंहिता लागू जाल्ल्यान वेंचणूक मुक्त, सुरळीत आनी शांतीकायेच्या वातावरणांत घेवपा खातीर वेंचणूक आयोगान सगळें राजकीय पक्ष, वेंचणूकेक उभे राविल्ले उमेदवार, अधिकृत एजंट, स्टार प्रचारक, उमेदवारांक आपलो तेंको दिवपी आनी लोकांनी आचारसंहितेच्या नेमांक पाळो दिवपाचो आदेश दिला.
निर्वाचन अधिकार्याच्या पुर्व लेखी परवानगे बगर आचारसंहिता लागू आशिल्ल्या पणजी म्हापालिकेच्या वाठारांत भौशीक सभा, रॅली, रोडशो, पदयात्रा, कोनसो बसका, वाहनांची रॅली, राजकीय विशय आशिल्ली सांस्कृतीक कार्यावळ वा लोकांची गर्दी आशिल्ले खंयचीच हेर कार्यावळ आयोजीत करची न्हय. परवानगी घेवपा खातीर अर्जांत सुवात, थळ, तारीख, वेळ, मिरवणूक आसल्यार मार्गाचो आराखडो, लोकांची अपेक्षीत हाजेरी आनी लावडस्पिकर वाहनांचो तपशील स्पश्टपणान दिवपाक जाय. लावडस्पिकर वापरा खातीरय पुर्व लेखी परवानगी घेवपाक जाय आनी ध्वनी प्रदुशणाच्या नेमांक पाळो दिवपाक जाय. आचारसंहिता नेम मोडल्यार दिल्ली परवानगी रद्द जातली. तशेंच आचारसंहिता नेम मोडल्यार कायदेशीर कारवाय जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
