भांगरभूंय | प्रतिनिधी
कुठ्ठाळेचो भुयारी मार्ग आनी पांय पूल उबारपा विशीं सकारात्मक चर्चा
पणजी : कुठ्ठाळे- उपासनगर वाठारांतल्या नागरिकांच्या फाटल्या कितल्याशाच दिसांच्या मागणेची अखेरेक दखल घेवन बांदकाम मंत्री दिगंबर कामत हांणी बुधवार ह्या भागाची पळोवणी केली. आमदार अंतोन वास आनी थळाव्यांचे हाजेरींत हे जोड पळोवणे मजगतीं, भुयारी मार्ग (अंडरपास) वा पांय पुलाचें निर्माण करपा विशीं सकारात्मक चर्चा केली. नागरिकांनी ह्या वाठारांत भुंयारी मार्गाची मागणी केल्या. हे फाटभूंयेर मंत्री कामत हांणी आस्वासन दिलें की, फ्लायओव्हराच्या सकयल्यान मोटार चलोवपाक मेळटली, अश्या भुयारी मार्गाच्या वेव्हारतेची तांत्रीक तपासणी करतले. जर तांत्रीक कारणाक लागून भुयारी मार्ग शक्य नासल्यार पर्याय म्हणून एस्केलेटरा सयत चलपाचो पूल उबारपाचो विचार करतले. ज्येश्ठ नागरिकांची गैरवेवस्था जावची न्हय म्हणून एस्केलेटरची सुविधा म्हत्वाची थारतली, अशें मत श्री. कामत हांणी उक्तायलें.
आमदार अंतोन वास हांणी हे पळोवणेचेर समाधान उक्तायलां. पळोवणेक लागून समस्येचो व्हड भाग सुटिल्ल्याचें तांणी सांगलें. योग्य तांत्रीक तोडगो काडून कामाक सुरवात जातली, अशी आस्त तांणी उक्तायली.
मजगतीं, ह्या प्रकरणाची फाटपुरवण करपाक समाजीक वावुरपी अच्युत नायक हांणी सात वांगड्यांची समिती स्थापन करपाची घोशणा केल्या. ती बेगीनूच भौशीक बांदकाम मंत्री, थळावे आमदार आनी राष्ट्रीय महामार्ग प्राधिकरणाच्या अधिकार्यांची भेट घेवन संभाव्य उपायांचेर चर्चा करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
