भांगरभूंय | प्रतिनिधी
पेडणें: मांद्रें मतदार संघांतल्या ज्येश्ठ नागरिकां खातीर फिजिओथेरपी ही उपचार पद्धत पोकेवाडो मोरजेच्या सरकारी मुळाव्या विद्यालयाच्या वाठारांत मांद्रें उदरगत संस्थे खाला सुरू करतले, अशी म्हायती मांद्रें आमदार जीत आरोलकार हांणी ह्या वाठाराची पळोवणी केले उपरांत दिली.
ही वखदां बगर व्यायामा वरवीं शारिरीक हालचाल, तांक आनी कार्यक्षमता परत मेळोवन दिवपी वैजकी उपचार पद्धती आसा. दुखापत शस्त्रक्रिया वा पोरण्या आजाराक लागून जाल्ल्या सांदे स्नायूंचो त्रास उणो करपा खातीर आनी पुनर्वसना खातीर हाचो वापर जाता. ताका लागून खुबश्या तरणाट्यांक म्हापशें वा जाल्यार पयस वयचें पडटा. ह्या सगल्यांची दखल घेवन मांद्रें मतदार संघांतल्या मोरजेच्या पोकेवाडो वाठारांत हीं उपचार केंद्रां बेगीनूच सुरू करतले अशें आमदार जीत आरोलकार हांणी सांगलें.
सरकारा कडल्यान सरकारी मुळाव्या विद्यालयाची इमारत मांद्रें उदरगत संस्थेन ताब्यांत घेतलां. ही शाळा बंद पडिल्ल्यान ताचो वापर जावचो. मांद्रें मतदारसंघांतल्या नागरिकांक फिजिओथेरपी हे सेवेचो लाव जावचो. हे खातीर आपले यत्न आसात, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
