भांगरभूंय | प्रतिनिधी
पणजी : तिवायवाडा, कळंगूटेच्या ‘स्प्रिंगबीच कॉटेजिस रिसॉर्ट’क फांतोडेर ५.३० वरांचेर उजो लागलो. तातूंतल्या आठ कॉटेजी मदल्यो तीन कॉटेजी लासून गोबोर जाल्यो. पांच कॉटेजी उजो पालोवपी दळाक वाटोवपाक येस आयलें.
उजो लागिल्ल्याची म्हायती मेळटकच उजो पालोवपी दळ रोखडेंच घडणुके सुवातेर पावलें. उज्याचो नेट पळोवन म्हापशें आनी पिळर्णचे उजो पालोवपी दळाचे बंब मागयले. जवानांनी यत्न करून उजो पालयलो. ताका लागून पांच कॉटेजी आनी हेर मालमत्ता उज्या पसून वाटोवप शक्य जालें.
शॉर्टसर्कीटाक लागून उजो लागिल्ल्याची शक्यताय उक्तायल्या. ‘स्प्रिंगबीच कॉटेजिस रिसॉर्ट’चे आगुस्तीन फर्नांडीस हे धनी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
