भांगरभूंय | प्रतिनिधी
ह्या प्रस्तावा खातीर एक म्हयन्या भितर आक्षेप नोंद करचेः उद्देग खातें
पणजीः दिवचल तालुक्यांतल्या सुर्ला गांवांत कोको कोला गुदांव आनी माजोड्ड्यां तारांकीत हॉटेल उबारपाचो गोंय गुंतवणूक उर्बा मंडळान (आयपीबी) प्रस्ताव दवरला. हे दोनूय प्रकल्पांक मान्यताय दिवपा खातीर उद्देग खात्यान सुचोवण्यो आनी आक्षेप मागयल्यात. हे विशींची कळोवणी उद्देग खात्यान जारी केल्या.
मेसर्स ऍक्रक्स मार्केटिंग एलएलपी हांणी २९ ऑगस्ट २०२५ ह्या दिसा दिवचलच्या सुर्ला गांवांत कोका कोला ह्या अल्कोहोल मुक्त पेयाचो गुदांव आनी वितरण केंद्र स्थापीत करपाचे बाबतींत गोंय गुंतवणूक प्रोत्साहन मंडळाक ह्या प्रकल्पा खातीर अर्ज केल्लो. मंडळान हया प्रकल्पाक तत्वतः मान्यताय दिल्या आनी ह्या क्षेत्राक गुंतवणूक प्रोत्साहन क्षेत्र म्हणून घोशीत करपाची शिफारस सरकारा कडेन केल्या.
हो प्रकल्प सुर्लाच्या आंबेकोडील मळ वाठारांत २६०० चौ. मी. सुवातेंत सर्वे क्र. २/ १, २/ २, २/ ३, २/ ४, २/ ५, २/ ६ आनी २/ ७ भितर येता.
मजगतीं मेसर्स जेएमजे बीच रिसोर्ट प्रायव्हेट लिमिटेड हांचे कडल्यान २७ फेब्रुवारी २०२४ क साश्ट म्हालांतल्या माजोड्डें गांवांत अस्तित्वांत आशिल्ल्या हॉटेलाचे मालमत्तेंत ६० कुडींचो विस्तार करपाच्या ह्या प्रकल्पा खातीर गुंतवणूक मंडळाक अर्ज केल्लो. मंडळान ह्या प्रकल्पाक तत्वतः मान्यताय दिल्या आनी ह्या क्षेत्राक गुंतवणूक प्रोत्साहन क्षेत्र म्हणून घोशीत करपाची शिफारस सरकारा कडेन केल्या. माजोड्डेंच्या अफोरमेंटो दास प्रेस वाठारांत ७८०० चौ. मी सुवातेंत सर्व्हे क्र. ६७/२ वाठारा भितर येता.
ह्या दोनूय प्रकल्पां खातीर गोंय गुंतवणूक प्रोत्साहन आनी सिंगल विण्डो मंजुरी सुलभताय अधिनियम, २०२१ (२०२१चो गोंय अधिनियम १९) च्या कलम ४२ च्या उप कलम (२) खाला ज्या मनशाक ह्या प्रस्तावाचे बाबतींत कितेंय आक्षेप घेवपाचो आसा, तांणी आपले आक्षेप कारणां सयत लेखी स्वरुपांत उद्देग खात्यान मागयल्यात. आपले आक्षेप एका म्हयन्याच्या काळांत, संचालक, उद्देग, वेपार आनी वाणिज्य संचालनालय, गोंय सरकार, पणजी हांचे कडेन सादर करचे, अशी कळोवणी उद्देग खात्यान जारी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
