भांगरभूंय | प्रतिनिधी
हालींसराक आकाशवाणीवेल्यान प्रसारीत जावपी खबरां विशीं खुब कितें खबरांपत्रांनी येता. ते विशीं हें म्हज्या मनांतलें.
सगळ्यांत पयली खोस जाली की लोक अजुनुय रेडियो आयकतात आनी चड खोस जाली की आमच्यो खबरो कान आनी मन लावन आयकतात. हाका लागुन देव बरें करूं.
आतां उलोवया चुकांविशीं. वाचक आमच्यो चुको सांगतात, दाखोवन दितात. जो वापरचो तो शब्दुय सुचयतात. हाका लागुन खूब बरें दिसलें. कांय दिसा फाटीं हे विशी फेसबुकारय चलतालें. आतां पेपराचेर तर सारकें येता. खरें तर आपल्या घरचे भेद लोकांक सांगचे न्हय, तरी पुण हांव थोडें सांगुंक सोदतां.
एक म्हणजे चुको जातात. मान्य. पुण हें सरसकट सगळ्यांक लागु जाता?? सुक्या वांगडा ओलेंय जळटा तो हो प्रकार. सगळ्यांक एकाच पारड्यांत तोलप समा न्हय.
दुसरे. आकाशवाणीत जे स्थायी आनी थळावे खबरां वाचक आनी संपादक आशिल्ले ते निवृत्त जाले. काय हंगामी, पूण दिग्गज येताले, तांकांय साठी जाली की बंद केले. तांची सुवात सरकार भरीना. खबरां वाचक सगळे हंगामी. तातुंत चडशे नवें वेंचल्यात ते मराठीभाशक, जांका कोंकणी भाशेचें गिन्यान उणें वा शब्द मराठी हेलांत येतात. हाचे आदींचेय खबरां वाचक खुब जाण मराठीभाशक आसात, पुण तांचे कोकणीचेर बरेंच प्रभुत्व आसा. पुण हेर काय जाणा चुकतात म्हूण जें बरे वाचपी आसा तांचीय लक्तरां काडटात.
संपादक आसात, तेय कोंकणी भाशा नकळो. कारण ते दुसऱ्या राज्यांतले. मागीर हे परिस्थितींत खबरां वाचकाक सुदारतलो कोण? तांणी कोणाक विचारचें? आनी आतां गुगलबाबा जशें सांगता तें शब्दशः भुरगी वाचतात. तें वाक्य सुदारून कशें म्हणचें हाचें कांय जाणांक पडिल्लेंच ना, सुदारणा करपाची इत्सा ना. पुण अशा वागण्यांनी आमीं आदलीं वा आतांचीं कांय बरी भुरगीं, तांकांय हीं आयकुप्यांचीं दुशणां लागतात, ताचें खूब वायट दिसता. हांवे आरजे म्हूण कितलींशींच वर्सां काम केलां. दिग्गज कलाकारा कडच्यान शिकलां. आतां खबरां वाचक म्हूण काम करतना अजुनुय कांय शब्द सुचले नात वा कळ्ळे नात तर मुकेश थळी वा दामोदर घाणेकार हांचे कडेन विचारतां. खूब फावटी घाणेकार सुदारपी संदेश धाडटा. ते उगडासान दुसरे फावट घेतां. पुण हें जण एकलो आपणायत हें ताचेर निंबुन आसता.
दुसरे वाचताना केन्ना केन्ना अडखळप हे साहजिक. थोडे शब्द इंग्लीश भाशेंतूच घेवचे पडटात. ताका पर्याय ना. मनीस उलयतना चुकतात. आमी सदचीं कोंकणी उलयतना खंय सगले कोंकणी शब्द वापरतात? पुण म्हणुन रेडियोचेर केन्नाय एखाद दुसरो शब्द चुकलो वा वापरलो तर ताचे कडे आडनदर करपा इतले आयकुप्यांचे काळीज व्हड आसा हेंय हांव जाणा.
तुमी आयकता, चुको सांगता खुब बरें, पुण एक मागणें. जे दिसा ह्यो चुको कोण करता वा परत-परत करता ती तारीख वा ताचें/ तिचें नांव घालुन बरोवचें. आमच्या संपादकाकुय हें कळपाक बरें. म्हजे कडेन जर कसली चुक जाल्या तर माफ करचें, म्हाका सांगचें आनी हांव ती सुदारपाचो नक्कीच यत्न करतलें.
अशेंच आकाशवाणी, खबरो आयकत रावात आनी तुमचो हक्काचो मोग दाखयात. देव बरें करूं
राजश्री कामत
8806056757
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
