भांगरभूंय | प्रतिनिधी
पणजीः कलम ३९ (अ) आड नगर नियोजन मंत्री विश्वजीत राणे हांच्या बंगल्या मुखार आंदोलनांत वांटेकार जाल्ल्या आंदोलकांची पणजे पुलीस स्टेशनांत सोमारा चवकशी जाली. ही चवकशी फकत विरोधकांचो आवाज चेंपपा खातीर, तशेंच तांकां भेकडावपाचो यत्न केला. मात पुलिसांनी एफआयआर प्रत आजूनय दिवंक नाशिल्ल्यान नेमकें खंयच्या कारणा खातीर तांची चवकशी जाता हे विशीं कसलीच कल्पना नाशिल्ल्याचें आंदोलकांनी सांगलें.
मंत्री विश्वजीत राणे हांच्या दोना पावल बंगल्या मुखार आंदोलनांत वांटेकार जाल्ले समाज वावुरपी आनी राजकी फुडार्यांक पणजे पुलिसांनी दिल्ले चवकशी खातीर समन्स धाडिल्ले. ह्या समन्सांक पाळो दित समाज वावुरपी आनी फुडारी पणजे पुलीस स्टेशनांत सकाळीं ११ वरांचेर चवकशी खातीर हजर रावले. आरजीपीचे अध्यक्ष मनोज परब, कॉंग्रेस फुडारी समिल वळवयकार, गाकुवेधचे अध्यक्ष गोविंद शिरोडकार, तशेंच भंडारी समाजाचे फुडारी आनी समाज वावुरप्यांची सुमार वर भर पुलिसांनी चवकशी केली.
चवकशे उपरांत उलयतना आंदोलनाचें फुडारपण करपी आरजीपीचे अध्यक्ष मनोज परब हांणी सांगलें, नोंद केल्ली एफआयर ही फकत पिडणूक आनी हे एफआयरींत फुडें कितें सिद्ध जावपाचें ना.
ह्यान पयलीं आमचेर घाल्लीं कितलींशींच प्रकरणां भायर पडल्यांत. लोकांक फकत हांगा आपोवन, तांकां बसोवन त्रास करप चालूच आसा. आमकां सकाळीं ११ वरांचेर आपयल्लें आनी तीन वरां खातीर चवकशी करून दनपरां दोनांक सोडलें. फकत वेळ वगडावपाचें काम चल्लां, असो आरोप परब हांणी केलो.
पुलिसांनी देड हजार लोकांक समन्स काडल्या. जे लोक आंदोलनांत वांटेकार नासले तांकांय नोटीसी पावल्यात. ज्या लोकांनी केन्नाच आपल्या आंगार केसी घेवंकनात वा पुलीस स्टेशनाचेर पांय दवरूंक ना तांच्या घरा पुलीस धाडून, तांकां नोटीसी दिवन भंयाचें वातावरण तयार करपाचें काम चल्लां, असो दावो परब हांणी केला.
नोंद केल्लें गुन्यांवांचें कलम आनी केस नंबर आमकां सगलें दिलां. मात एफआयराची प्रत आमकां दिवंक नाशिल्ल्यान कागाळ कोणें केल्या आनी कित्याक केल्या असो प्रस्न पुलिसांक विचारतकत मामलेदारान कागाळ नोंद केल्ल्याचें सांगले. मात खंयच्या आरोपा खाला ही कागाळ केल्या हें मात पुलिसांनी सांगूंक ना, अशें गाकुवेधचे अध्यक्ष गोविंद शिरोडकार हांणी सांगलें.
२०२७त भाजपाची हार निश्चीत आसा आनी ते खातीर वेगवेगळे पद्धतीन आवाज दामपाचो यत्न चल्ला. गोंय तिगोवपाक आनीक १०० केसी आंगार घेवपाक तयार आसा. भाजपान गोंयचे जनतेक त्रास दिवपाचो वा विरोधकांचो आवाज दामपाचो यत्न करून तितल्याच नेटान आमी उबे रावतले. जनता आमकां साथ दितले हें भाजपाक सांगपाक सोदतां, अशें कॉंग्रेसीचे फुडारी समिल वळयवकार हांणी सांगलें.
जी नोटीस पणजी पुलीस स्टेशनांतल्यान आयल्या तातूंत दिसून आयलां, चवकशी खातीर कांय जाणांक पोरणे गोंय वा आगशे पुलीस स्टेशनांत आपयल्या. जो कायदो अस्तिवांत आसा ताचे खाला काम करचें सोडून पुलीस खातें हें राजकी पक्ष जालां अशें दिसून येता, असो आरोप आंदोलकांचे आदोगाद अमित पालेकार हांणी केलो.
एफआयआर प्रत मेळूंक नाशिल्ल्यान कसले आरोप केल्यात वा कोणी कागाळ केल्या हें अजूनय कळूंक ना. खंयच्याय पुलीस स्टेशनांत चवकशे खातीर आपोवप ही एक बेकायदेशीर गजाल आसा. गुन्यांव पणजे पुलीस स्टेशनाचे हद्दींत जाल्ल्यान ही चवकशी पणजे पुलीस स्टेशनांत आनी पणजे पुलीस स्टेशनाचे हद्दींत करपाक जाय, अशें पालेकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
