भांगरभूंय | प्रतिनिधी
पणजी : पणजी शिगमोत्सव समिती वतीन ३ ते ८ मार्च मजगतीं ३७ व्या शिगमोत्सवाचें आयोजन केलां: ते प्रमाण ३ तारखेर आझाद मैदानार गुलालोत्सव मनयतले. जाल्यार ७ तारखेर पोरणें सचिवालय ते कांपाल मैदान ह्या मार्गार चित्ररथ मिरवणुकेचें आयोजन केल्ल्याची म्हायती समितीचे अध्यक्ष श्रीनिवास धेंपो हांणी दिली. सोमारा पणजे जाल्ले पत्रकार परिशदेंत ते उलयताले. ह्या वेळार शांताराम नायक, मंगलदास नायक आनी किशोर नार्वेंकार हाजीर आशिल्ले.
धेंपो हांणी, ३ मार्चाक सकाळीं ९.३० वरांचेर श्री महालक्ष्मीचें दर्शन घेवन परंपरीक रोमटामेळ आझाद मैदानार पावतलो. उपरांत हांगा रंगांनी खेळटले. ४ मार्चाक सांजेवेळार सात वरांचेर आझाद मैदानार संगीताची कार्यावळ जातली. ५ मार्चाक सिद्धकला, ६ तारखेक सुरसंगम, ७वेर दोन ‘यो घर तुमचेंच’ हें कोंकणी नाटक जाल्यार ८ मार्चाक ‘लावण्यखणी’ हे कार्यावळीचें आयोजन केलां. ह्यो सगल्यो कार्यावळी आझाद मैदानार जातल्यो.
पर्यटन खात्यान अंदूं रोमटामेळ मिरवणूक वेळार सोंपपाची सुचवणी केल्या. रोमटामेळ रातच्या १२ वरां मेरेन सोंपोवप गरजेचंें. मिरवणुकेंत शिस्त येवचे खातीर अंदूं रोमटामेळांत चडांत चड १५० जाणांकूच परवानगी दितले. रोमटामेळ लॉटरी पद्धतीन निवडटले. हे खातीर इत्सुकांनी ४ मार्चाक समितीच्या पणजेच्या कार्यालयांत सकाळीं १० ते दनपरां १ मजगतीं हाजीर रावचें. कोणाकूच स्पॉट एन्ट्री दिवचे ना. मिरवणूक वेळार सोंपोवची म्हूण आमी सगल्यां कडेन मागतां.
अंदूं १०.५७ लाखांचीं इनामां
धेंपो हांणी, अंदूंच्या शिगमोत्सवांत विवीध मळार वट्ट १०.५७ लाख रुपयांची इनामां दितले. हातूंत चित्ररथां खातीर ५.३५ लाख, रोमटामेळा खातीर ३.९५ लाख, लोक नाचा खातीर १.२८ लाख, फॅन्सी ड्रेस सर्तींत ६९ हजार ५०० रुपयांचीं इनामां दितले.
चोवगांचो भोवमान
अंदूं समिती वतीन उमकांत वाडकार, सुरेंद्र वळवयकार, मॅक्सी परेरा आनी अवधूत आंगले हांचो भोवमान करतले. शिगमोत्सव समितीची म्हायती अधिकृत वेबसायटीचेर आसा. बेगीनूच हे वेबसायटीचेर जमा आनी खर्चाचीय म्हायतीय अपलोड करतले अशे धेंपो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
