भांगरभूंय | प्रतिनिधी
मडगांव: रावणफोंडच्या रेल्वे पुला लागसार सुरू आशिल्लो चारपदरी रस्तो आनी पुलाच्या कामा मजगतीं सोमारा साळावले प्रकल्पांतल्यान उदकाची पुरवण करपी मुखेल उदकाचें पायप जेसीबीचो धपको बसून फुटिल्ल्या हजारांनी लिटर उदकाची नासाडी जाली. हाका लागून ह्या वाठारांतल्या उदकाचे पुरवणेचेर व्हड परिणाम जाला.
पॉवर हावज ते रावणफोंड सर्कल मेरेनच्या चारपदरी रस्त्याचें काम फाटल्या म्हयन्यां सावन सुरू आसा. सध्या रावणफोंड सर्कला कडेन वचपी रस्त्याचें काम सुरू आसा. सोमारा सकाळीं रस्त्याचे कुशीक मातयेची रांस घालतना जेसीबीन हें उदकाचें पायप फोडलें. साळावलेच्या जलप्रकल्पांतल्यान जावपी उदकाचे पुरवणेचें हें मुखेल पायप आशिल्ल्यान तें फुट्टाच व्हडा प्रमाणांत उदकाची नासाडी जाली.
विशेश म्हळ्यार, इतली व्हड घडणूक घडूनय जलस्रोत वा भौशीक बांदकाम खात्याचे खंयचेय अधिकारी बेगोबेग घडणुके सुवातेर पावूंक ना. प्रशासनाच्या ह्या निश्काळजीपणा विशीं थळाव्या नागरिकांनी खर तिडक उक्तायल्या. हें मुखेल उदकाचें पायप आशिल्ल्यान आतां नावेले आनी मडगांव शाराचे उदकाचे पुरवणेचेर हाचो गंभीर परिणाम जावपाची शक्यताय उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
