भांगरभूंय | प्रतिनिधी
तीन वर्सांच्या काळा खातीर १६ वांगडी
पणजी : केंद्रीय पर्यावरण, रान आनी हवामान बदल मंत्रालयान फुडल्या तीन वर्सांच्या काळा खातीर १६ वांगडी गोंय दर्यादेग वेवस्थापन प्राधिकरणाची (जीसीझेडएमए) पुनर्रचणूक केल्या. हे समितीच्या अध्यक्षपदार गोंय सरकाराचे पर्यावरण सचीव आसतले, जाल्यार पर्यावरण संचालक हे वांगडी सचिव म्हणून काम पळयतले.
प्राधिकरणाच्या फाटले समितीचो कार्यकाळ डिसेंबर २०२५त सोंपिल्लो. ह्या नव्या प्राधिकरणाचेर रान, पंचायत, पर्यटन, उद्देग, जलसंपदा, नगरविकास, मत्स्यव्यवसाय, भूमी अभिलेख आनी गोंय राज्य प्रदूशण नियंत्रण मंडळ अश्या विवीध खात्यांतल्या वरीश्ठ अधिकार्यांची वांगडी म्हणून नियुक्ती केल्या.
तशेंच तज्ज्ञ वांगडी म्हणून एनआयओचे वैज्ञानीक सुशांत नायक, संदीप चोडणेंकार, भौशीक बांधकाम खात्याचे मुखेल अभियंते, आदले कार्यकारी अभियंते गणेश वेळीप आनी डॉन बॉस्को कॉलेज ऑफ इंजिनिअरिंग (फातोर्डा) हांगचे सहाय्यक प्राध्यापक सत्येश काकोडकार हांचो आसपाव आसा. तशेेंच, पर्यावरण संशोधन संघटणेच्यो संस्थापक हर्षदा सच्चिदानंद गांवस ह्योय वांगडी आसात.
गोंय दर्यादेग वेवस्थापन प्राधिकरणाकडेन दर्यादेग नेम क्षेत्रांतल्या (सीआरझेड) उदरगतींच्या कामाचे नेम आनी देखरेख करपाची म्हत्त्वाची जापसालदारी आसा. हातूंत मुखेलपणान ६० दिसां भितर प्रकल्प प्रस्तावांची तपासणी करप आनी नेम मोडप्यांचेर खर कारवाय करप, ह्या कर्तव्यांचो आसपाव केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
