भांगरभूंय | प्रतिनिधी
वकिलाचो समाजांत शेक आसता. ताका दुसरे भियेंतात. येरादारी पुलीस केन्ना तांकां तालांव दितना तुमी पळयल्यात? काळ्या कोटाची ही जादू, मात हो तितलोच कठीण, मेहनत घेवपा सारको वेवसाय. वकील जावपाक बायलो कांय वर्सां पयलीं फाटीं फुडें जातालीं, मात आतां तो काळ उरूंक ना. आतां बायलो वकील सोडात, न्यायाधीश पसून जाल्यात. सध्या एका निवृत्त न्यायाधिशान गोंयांत चळवळ उबी केल्या, ती तुमकां खबर आसतलीच.
जांकां मुद्देसूत उलोवपाक येता, जांची स्मरणशक्त बरी आसा, इंग्लीश उलोवपाक कळटा, तांणी वकिलीचें शिक्षण घेवचें. आयच्या काळांत एकवेळ दोतोर जावंक ना जाल्यार चलता, पूण ताणें वकील जरुर जावंक जाय. चलयांत तर हो वेवसाय बरो. लग्न जावन दुसऱ्या गांवांत गेले तरी वकिली बंद करपाची गरज ना. तांकां आसा थंयच्यान वकिली करपाक मेळटा.
म्हजे एके कार्यावळींत एके चलयेन विचारिल्लें म्हाका याद जाता. तें विचारतालें, चलयांनी कसलें करियर करपाचें? कित्यात कर भुरगीं जातकच वा लग्न जातकच करियराची कोण खात्री दिवपाक शकना. ताचो प्रस्न ना म्हणल्यार विचार करपा सारको आसलो. हांवें ताका भलायकी विशीं करियर करपाक सांगिल्लें. मुखार ताणें कितें केलें ताचो म्हाका उगडास जायना. पूण वकिली फांटो बरो म्हणपाक जाय. सध्या गोंयांत जमनी खातीर आनी हेर कारणां खातीर केस्तांवां सुरू जातात, तीं पळयल्यार वकिली फांट्याक गोंयांत तरी मरण ना.
गोंयांत समान नागरी कायदो आसा. देशांत एखादें राज्य सोडल्यार तो ना. उत्तराखंडांत हालींच तो लागू केला, अशें खंयतरी वाचिल्लें. समान नागरी कायद्याक लागून हांगा घटस्फोट उणे जातात आसुये, तरीय वकील हो जायच, मागीर तो गुन्यांव, सिव्हील वा काॅर्पोरेट फांटो जावं.
वकिलीचीं शिक्षण दिवपी गोंयांत दोन नामनेच्यो काॅलेजी आसात. भायर वचपाची गरज ना. पणजे साळगांवकार काॅलेज आनी मडगांवां कारे काॅलेज. 28 फेब्रुवारीक जल्मल्ली ममता नायक ही वकील. ती शास्त्रीय गायिका आनी नाचपीय. तिणें ‘ताचो प्रयत्न’ हो म्हायतीपटूय दिग्दर्शित केला. ती मूळ सांग्या वयली. ती सांगता, ‘म्हाका जेसीचो खूब फायदो जालो. जेसींत वतकच म्हाका जायतीं इनामां मेळ्ळीं. समाजसेवा करपाक थंयच शिकली.’ महाराष्ट्रांतल्या एके समाजसेवी समितीची ती मुखेली. प्रशिक्षक तयार जावपाक तिचें प्रशस्तीपत्रक गरजेचें आसा. खेरीज तिणें काॅर्पोरेट वकील म्हूण काम केलां. गुन्यांव केशींची ती तज्ञ. सध्या ती गोवा पब्लीक सेवा कमिशनाचे परिक्षेची तयारी करता. देखून तिणें वकिलीच्या कामांतल्यान ब्रेक घेतला. बारावी जाले उपरांत क्लेट परिक्षा दिवची पडटा. तुमी पांच वर्साचो कोर्स करपाक शकता. पदवीधर जाले उपरांत तीन वर्सांचो कोर्स. वकिली करपाचो परवानो मेळ्ळे उपरांत तुमी सरकारी, खाजगी नोकरी करपाक शकतात. न्यायाधीश लेगीत जावपाक शकतात. मात स्वतंत्र वकिली रोखडीच करपाक मेळना. काॅलेजींत मूट कोर्ट केल्ले आसले तरी खऱ्या कोर्टांत काम करचे पयलीं तुमकां अणभवी वकिलाचें मार्गदर्शन घेवचें पडटा. सुरवातीक बऱ्या वकिला लागी वर्सां काडचीं पडटात.
ममता नायक थारावनूच वकिली फांट्यांत गेल्ली. ती सांगता, ‘थंय गरज आसता ती संवादाची, स्मरणशक्तीची. हें सगलें येता हो आत्मविस्वास आसल्यार तांणी जेसी सारक्या संस्थे वांगडा काम करचें. म्हाका ह्या क्लबान खूब कितें दिलें. म्हत्वाची गजाल म्हणल्यार आत्मविस्वास दिलो. ताका लागून हांव खंयचेय माचयेर रावन भाशण करूंक शकता. ही वकील जावपाचें पयलें सोंपण. ‘ तुमकां चड म्हायती जाय जाल्यार ममता हांकां 77580 72492 ह्या नंबराचेर फोन करपाक शकतात.
विज्ञान दीस
28 फेब्रुवारी हो विज्ञान दीस. नोकरेचे मुलाखतीक हो दीस कित्याक मनयतात, असो प्रस्न विचारपाक शकतात. तुमकांय तो पडला आसतलो. मनशा भितर उमळशीक आसता. ल्हानपणा सावन ताका प्रस्न पडपाक जाय. उमळशीक वाडपाक जाय. तुमकां जर हाची जाप खबर ना जाल्यार तुमी शिक्षकाक विचारुं शकतात. आयज इंटरनेटाचेर ती सोदपाक मेळटा. ते खातीर चॅटजिपीटी, गुगल आसाच.
विज्ञान फांट्याचें पयलें नोबेल इनाम भारताक मेळिल्लें. ते शास्त्रज्ञ आशिल्ले सी व्ही रमण. 28 वेर तांणी रमण इफेक्ट हो पेपर सादर केल्लो. देखून तो विज्ञान दीस. आमी सगल्यांनी विज्ञानाक मान दिवपाची आयज गरज आसा.
\डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
