भांगरभूंय | प्रतिनिधी
येरादारी वेवस्था आनी हेर नेमां विशीं सुचवण्यो जारी
दिवचल: दिवचलच्या साळांतलो नामनेचो गडे उत्सव मंगळार ३ ते बिरेस्तार ५ मार्च अशे तीन रातीं मनयतले.
ह्या गड्या उत्सवाची येरादारी वेवस्था तशेंच हेर नेमां विशीं सुचवण्यो जारी केल्यात. हालींच हे विशीं बसका जाली. उपजिल्लोधिकारी शुभम नायक, दिवचलचे मामलेदार शैलेंद्र देसाय, पुलीस निरीक्षक विजय राणे सरदेसाय, श्रीमहादेव भूमिका देवस्थान समितीचे अध्यक्ष मेघश्याम राऊत आनी समिती वांगडी, उपसरपंच देऊ राऊत, गडे वांगडी, साळांतल्यो विवीध संस्था, क्लब आनी सरकारी यंत्रणेची बसका जाली. हे बसकेंत दिल्ल्यो कांय सुचोवण्यो खरपणान पाळच्यो अशें उपजिल्हाधिकारी शुभम नायक आनी देवस्थान अध्यक्ष मेघश्याम राऊत हांणी सांगलें.
साळांतल्या श्रीभूमिका मंदिराच्या सभा मंडपांत मामलेदार शैलेंद्र देसाय हांचे अध्यक्षते खाला आनी उपजिल्लोधिकारी शुभम नायक हांच्या मार्गदर्शनाखाला जाल्ले बसकेंत पुलीस निरीक्षक विजय राणे सरदेसाय, पुलीस, येरादारी खात्याचे अधिकारी, उदका पुरवण अधिकारी, उजो पालोवपी दळाचे अधिकारी, वीज अधिकारी, भलायकी अधिकारी, अबकारी अधिकारी, साळ पंचायत सचीव मुकेश नायक, श्रीमहादेव भुमिका देवस्थानचे अध्यक्ष मेघश्याम राऊत, सचीव चंद्रकांत परब आनी हेर हाजीर आशिल्ले.
येरादारी वेवस्था
साळांत गड्यां खातीर प्रवेश करपाक तीन रस्ते आसात. धुमाशेच्या मार्गान येवपी गाडयांक हो रस्तो रातचो १०.३० मेरेन उक्त्तो आसतलो. १०.३० उपरांत तो मेणकुर्यां मैदाना कडेन बंद करतले. हाका लागून सगल्यो गाडयो कासारपाल मार्गान वळयतले. जाल्यार कासारपाल मर्गावेल्यान येवपी गाडयांक रातच्या ११ वरां उपरांत बंदी आसतली. जाल्यार सगल्या गाडयांक दोडामार्ग रस्त्यांतल्यान यो- वच करपाक मेळटलें. तशेंच कासारपाल आनी धुमाशेंचो मार्ग भाविकां खातीर फांतोडेर पांच वा साडे पांचा उपरांत उक्तो करतले. आपत्कालीन सेवे खातीर दोडामार्ग रस्तो उक्तो आसतलो.
सोर्याचेर बंदी
श्री भूमिका देवीक नाका आशिल्ल्या सोर्याचेर ह्यो तिनूय राती आनी दीस बंदी आसतली. तशेंच सोर्याची येरादारीचेरूय हांगा बंदी आसतली. जर कोण ह्या वाठारांत सोरो विकता, जाल्यार तांणी उत्सवाच्या दिसांनी सोरो विकचो न्हय. जर कोण सोरो विकतना सांपडल्यार अबकारी खात्याक ताचे आड खर कारवाय करपाची मेकळीक दिल्या.
मदलोवाडो ते सकयलो वाड्यावेल्या श्रीचव्हाटेश्वर देवळा मेरेन रस्त्याचे दोनूय वटेन दुकानां उबारपाक बंदी आसतली. भाविकांक चलपाक कसलेच तरेची आडखळ जावची न्हय म्हणून हो निर्णय घेतला. जर कोणाकूय दुकानां उबारतना सुवातेचो उणाव जाणवल्यार तांणी देवळाचे कमिटीक संपर्क करचो. तशेंच अंदूंच्यान गोबी मंचुरियन दुकानांचेर खर बंदी आसतली.
हो गडे उत्सव श्रद्धेचो उत्सव. हाका लागून खंयच्याच भाविकाक कसलेच तरेची आडखळ जावची न्हय, त्रास जावचे न्हय म्हणून हे नेम घाल्यात. ह्या गडे उत्सवाक कसलेच तरेचो वायट प्रकार घडचो न्हय म्हणून सगल्यांनी येतना आनी वतना एकामेकांक सहकार्य करचें. कसलोच बोवाळ, मस्ती करची न्हय. ग्रामपंचायतीनूय सहकार्य करपाचो उलो लोकांक मारला. गड्यांच्या तीन दिसांच्या काळांत मस्तेंपणा करचीं न्हय. तशें करतना कोणूय दिसल्यार पुलीस यंत्रणां योग्य ती कारवाय करतली, अशें बसकेंत स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
