भांगरभूंय | प्रतिनिधी
मरण आयिल्ल्या लोकांचो नेमको आंकडो उक्तो जावंक ना
नागपूर: नागपूरच्या कळमेश्वर तालुक्यांतल्या राऊळगांवांत एसबीएल एनर्जी लिमिटेड (पयलीं स्पेशल ब्लास्ट लिमिटेड) हे कंपनींत आयज सकाळीं स्फोट जालो. हातूंत १५ कामगारांक मरण आयलें आनी जायते जाण जखमी जाले. जखमीं मदल्या जायत्या जाणांची भलायकी गंभीर आसा. तशेंच मरण आयिल्ल्यांचो आंकडो वाडपाची शक्यताय आसा.
हे विशीं चड म्हायती प्रमाण एसबीएल एनर्जीचो प्रकल्प राउळगांवां लागसार येनवारा गांवांत आसा. हांगा डेटोनेटर्स, स्लरी एक्सप्लोजिव्ह, कास्ट बूस्टर्स, सिजमिक एक्सप्लोसिव्हसचें उत्पादन तयार करताले. आयज सकाळीं सुमार ७ वरांचे सुमाराक ताच्या एका युनिटांत अचकीत स्फोट जालो. हातूंत १५ जाणांक मरण आयलें. नागपूर ग्रामीण पुलीस अधीक्षक हर्ष पोद्दार हांणी हे विशीं म्हायती दिली. जखमींची नेमकी म्हायती अजून कळूंक ना. ही घडणूक घडली तेन्ना एसबीएलच्या वेगवेगळ्या युनिटांनी ३० परस चड कर्मचारी काम करताले. मरण आयिल्ल्यांचो आनी जखमींचो आंकडो वाडपाची शक्यताय आसा, अशें तांणी सांगलें.
जखमींक उपचारा खातीर व्हेले नागपूराक
दुसरे वटेन हे घडणुकेची म्हायती मेळटांच उजो पालोवपी दळ रोखडेच घडणुके सुवातेर पावले. स्फोटा उपरांत पातळिल्लो उजो नियंत्रणांत हाडपाचो यत्न तांणी केलो. पुलीस, थळावें प्रशासन आनी कंपनीचो बचाव पंगड झुजा पांवड्यार काम करतात. थंयचो कोळसो काडून उडोवपाचें काम सुरू आसा. ह्या कोळशा खाला कांय कामगार आडखळून पडल्यात असो भंय आसा. देखून हे घडणुकेंत मरण आयिल्ल्या लोकांचो नेमको आंकडो उक्तो जावंक ना. जखमींक फुडल्या उपचारा खातीर नागपूराक व्हेल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
