परिक्षा

भांगरभूंय | प्रतिनिधी

भावंडांनो,
आतां कांय दिसांनी तुमच्यो परिक्षा सुरू जातल्यो. परिक्षा लागीं पाविल्ल्यान कांय जाणां परिक्षेच्या चेंपणांत आसा जाल्यार कांय भावंडां परिक्षेक आजून कांय दीस उरल्यात म्हूण मेकळेपणान, हुस्क्या विरयत भोंवतात, हांसत खेळत मोबायल, टीव्ही पळयतात. पुणून भावंडांनो, एक मतींत दवरात तुमकां शिक्षण बरे तरेन घेवपाचें आसा. शिक्षणा वरवीं तुमकां तुमची सर्वांगीण उदरगत हातासपाची आसा. तेचपरी घरांचें, गांवचें, राज्याचे तशेंच तातूंतल्यान देशाचे उदरगतीक पालव दिवचो असा. तुमकां स्वता खूब कितें मेळोवपाचें आसा आनी तुमकां हेरांकूय खूब कितें दिवपाचें आसा.
भावंडांनो, परिक्षेचो भंय धरूं नाकात. त्या भंयान तुमच्या मनाचें बळगें खचूंक दिवं नाकात. तुमी अभ्यास करपी भुरगीं. तुमचे भितर मुखार सरपाची जिद्द आसा. मागीर परिक्षेक कित्याक भिवपाचें? तुमच्यांतलें बळगें वाडीक लायात. कश्ट करपाची इत्सा दवरात आनी मुखार सरात.
भावंडांनो, म्हज्या जाण्टेल्यांनी म्हाका सांगिल्लें, येसा फाटल्यान धांवप ना, पूण अशे तरेन अभ्यास करप की यशूच आमच्या फाटल्यान धांवत येतलें. ते खातीर सांगतां, तुमचे भितर आळसाय हाडूं नाकात.
वेळेचें म्हत्व लक्षांत घेयात. वेळेचो एक खीण लेगीत फुकट वचचो ना हाचें भान दवरात. तोच खीण तुमकां कितलो तरी मुखार पावयतलो. अभ्यास करकतच जैत तुमच्या वांट्याक येतलें हें विसरूं नाकात.
भावंडांनो, परिक्षेंत फकत पास जाली म्हणून जायना. तर मतींत दवरात. आयचो हो काळ स्पर्धात्मक आसा. सगळ्या मळांनी, वाटांनी आयज सर्त लागल्या. सगळे तरेचें शिक्षण घेवपाक प्रवेशा खातीर दरेकल्याक सर्तीक फुडो करचो पडटा. देखून म्हण्टां, पयलींच बऱ्या गुणांनी पास जाल्यार तुमी हे सर्तींतल्यान सहजतायेन मुखार वचूंक शकतात. तुमचें वा तांचें ध्येय साध्य करूंक पावतात. भावंडांनो, धावेची परिक्षा ही तुमच्या जिणेंतली म्हत्वाची परिक्षा आसा. तुमच्या फुडाराची बुन्याद हेच परिक्षेचेर आदारिल्ली आसा. देखुनच भावंडांनो, खूब अभ्यास करात आनी जैत जोडून तुमच्या पालकांक खोशी करात.
शांत चित्तान आनी उमेदीन परिक्षेक फुडो करात.. तुमकां म्हज्या अपुरबायेच्या भावंडांक परिक्षे खातीर म्हज्यो लाख लाख शुभेच्छा..
उल्हासभाई