उर्बा जैताची

भांगरभूंय | प्रतिनिधी

ताच्या पुताक हालचाल करपाक जायनासली, दिसनासले, आनी तो स्वता जेवंक लेगीत शकनासलो. त्याच दुखाचो वापर करून ताणें 3 ट्रिलियन डॉलर्सची कंपनी उबी केली.
एका भुरग्याच्या भलायकेच्या संकटाक लागून इतिहासांतलो सगळ्यांत व्हडलो कॉर्पोरेट बदल जालो.
सत्या नाडेला तेन्ना 29 वर्सांचो आसलो. ताची घरकान्न अनू आपल्या पयल्या भुरग्याक जल्म दिवपाक रावताली. सगळें सारकें चलताले. मायक्रोसॉफ्टांत ताची कारकीर्द वयर वताली.
वाशिंग्टनच्या बेलव्यू शारांत हें तरणाटें जोडपें आपलें जिवीत उबें करताले. तेन्ना, गर्भावस्थेच्या 36 व्या सप्तकांत, अनुच्या लक्षांत आयलें की भुरगें हालचाल करिना.
तें रोकडेच इमर्जन्सी रूमांत पावलें. तांकां दिसलें हें सादारण आसतलें. पयले फावट आवय- बापय जावपाचो तो एक भंय आसतलो. पूण तें सादारण नासलें. दोतोरांनी रोकडीच इमर्जन्सी सिझेरियन शस्त्रक्रिया केली. तांचो पूत ‘झैन’ जल्मलो तेन्ना ताचें वजन फकत तीन पावंड आसलें. गर्भाशयांतच ताका ‘अस्फिक्सिया’ (ऑक्सिजनाचो उणाव) जाल्ली.
झैन हाका ‘सेरेब्रल पाल्सी’ हें गंभीर दुयेंस जाल्लें. तो दोळ्यांनी कु्ड्डो जालो. आनी पुराय जिवीतभर व्हीलचेअरार बसून रावपाचो ‘क्वाड्रिप्लेजिक’ (हात- पांय लुळे) जालो.
नाडेला पुरायपणान मोडलो. वर्सांन वर्सां तो ह्या झुजा कडेन झगडत रावलो. तो परत- परत विचारतालो, “हें म्हाकाच कित्याक जालें?” मागीर ताणें आपल्या घरकान्नीक पळयली. अनून केन्नाच विचारलें ना की “आमकांच कित्याक.” तिणें आर्किटेक्ट म्हणून आपली कारकीर्द सोडली. ती झैन हाका एका थेरपी सावन दुसऱ्या थेरपीक घेवन वताली. तिणें खंयचोच विचार करिनासतना आपल्या दुखा परस पुताच्या गरजांक पयलें प्राधान्य दिलें. आनी थंयच सत्याक कांय तरी जाणवलें. नाडेलाक समजलें की ताच्या वांगडा कांयच जाल्लें ना. जें कितें जालें तें ताच्या पुता वांगडा जालें. आनी आतां स्वताचेर चडूच करपाचें सोडून, झैनच्या दोळ्यांतल्यान जगा कडेन पळोवपाची वेळ आयल्या. त्या एका विचारान सगळें बदलून उडयलें. फकत ताच्या कुटुंबा खातीर न्हय. एका पुराय कंपनी खातीर.आनी निमाणें, पुराय तंत्रज्ञान क्षेत्रा खातीर.
वेळ फुडें गेलो, 4 फेब्रुवारी 2014. नाडेला मायक्रोसॉफ्टाचे सीईओ जालो. बिल गेट्स आनी स्टीव्ह बालमर हांच्या उपरांत ही पदवी मेळोवपी ते तिसरे मनीस. तांकां मेळिल्ली कंपनी एका संकटांत आसली. विंडोज 8 फ्लॉप जाल्लें. स्मार्टफोन क्रांतींत मायक्रोसॉफ्ट पुरायपणान फाटीं उरल्लें. कंपनी आपले डेव्हलपर्स, गिरायक आनी आपलें महत्व वगडायताली.
फाटल्या सीईओच्या काळांत, 14 वर्सांनी मायक्रोसॉफ्टाचे शेअर्स सुमार 30 टक्क्यांनी देवले. कंपनीची किंमत 300 अब्ज डॉलर्स आसली. हें आयकुपाक खूब दिसता, पूण 10 वर्सां सावन ती एकाच जाग्यार आसली, जाल्यार ॲपल आनी गुगल तांच्या खूब फुडें गेल्ले. उद्योगांतले लोक मायक्रोसॉफ्टाक एक “पोरणी वस्तू” म्हणपाक लागिल्ले.
“ताणीं मोबायलाची संद वगडायली.”
“क्लावड कॉम्प्युटिंग तांकां मेळ्ळें ना.”
“विंडोज हेंच तांच्या कडेन उरलां आनी आतां कोणाकच विंडोजची पडीन ना.”
नाडेला टिकाकारां कडेन जगडलो ना. ताणें अशें कांय तरी केलें जे कोणाकच अपेक्षीत नासलें. ताणें पुराय कंपनीची संस्कृती बदलली. आपल्या पुतान शिकयल्ली ‘सहानुभूती’ (empathy) ताणें मायक्रोसॉफ्टाच्या कामाचो बुन्याद केलो.
ताणें अंतर्गत स्पर्धा करपी ‘रँकिंग सिस्टम’ बंद केली, जंय कामगार एकमेकां कडेन झुजताले. ‘know-it-all संस्कृती बदलून ताणें ‘सगळें शिकपी’ learn-it-all संस्कृती हाडली.
मागीर ताणें असो एक निर्णय घेतलो जो सगळ्यांक पिशेंपण दिसलें. ताणें पुराय कंपनीक ‘विंडोज’ पसून पयस करून ‘क्लाउड कॉम्प्युटिंग’ कडेन वळयली. विंडोज ही मायक्रोसॉफ्टची वळख आसली. तिचो त्याग करप म्हणल्यार आत्महत्त्या करपा सारकें लोकांक दिसताले. नाडेलांक लोकांच्या विचारांची पडीन नासली. सीईओ जावंचे पयलीं ताणें कितलीं तरी वर्सां क्लावड विभागाचें फुडारपण केल्लें. फुडार खंयच्या दिशेन वता हें ताका खबर आसलें. आनी ताणें आपलें सगळें बळ थंयच लायलें. ताणें Azure क जगांतलें दुसरें सगळ्यांत व्हडलें क्लावड प्लॅटफॉर्म केलें. मागीर ताणें दुसऱ्यो कंपनी विकत घेवपाक सुरवात केली.
2016 त 26.2 अब्ज डॉलर्स खर्चून LinkedIn घेतलें. 2018 त 7.5 अब्ज डॉलर्स खर्चून GitHub घेतलें. 2021 त 19.7 अब्ज डॉलर्स खर्चून Nuance घेतलें. 2023 त 68.7अब्ज डॉलर्स खर्चून Activision Blizzard घेतलें. 120 अब्ज डॉलर्स परस चड खर्च करून ताणें मायक्रोसॉफ्टाक सोशल नेटवर्किंग, हेल्थकेअर AI आनी गेमिंग मळाचेर विस्तारलें. पूण ताचो सगळ्यांत व्हडलो निर्णय म्हळ्यार ‘OpenAI’ ह्या ल्हान कंपनी वांगडा केल्ली भागीदारी. ChatGPT नांव गाजचे कितलीं तरी वर्सां पयलीं नाडेलान फुडार पळयल्लो. ताणें अब्जांनी डॉलर्सची गुंतवणूक केली. मायक्रोसॉफ्टाच्या दरेक प्रॉडक्टांत AI हाडलें. जेन्ना दुसरे सीईओ AI गरजेचें आसा की ना हाचेर चर्चा करताले, तेन्ना नाडेलान मायक्रोसॉफ्टाक त्या क्षेत्राच्या केंद्रबिंदूर दवरल्लें. परिणाम आज आमचे मुखार आसा. ताच्या हाता सखल मायक्रोसॉफ्टाचे शेअर्स 1000 टक्क्यांनी वयर गेले. कंपनीची किंमत 300 अब्ज डॉलर्स सावन 3 ट्रिलियन डॉलर्स जाली. जानेवारी 2024 त, थोड्या काळा खातीर, मायक्रोसॉफ्ट ॲपलाक फाटीं टाकून जगांतली सगळ्यांत मोलादीक कंपनी जाल्ली. आनी जेन्ना तांकां १ ट्रिलियन डॉलर्सच्या मैलाच्या फातरा बद्दल विचारलें, तेन्ना नाडेलान सांगले , “जर कोणी आमच्या मार्केट कॅपचो उत्सव मनयता जाल्यार म्हाका ताची तिडक येतली.”
हीच ती विचारसरणी. ते फकत आकड्यांच्या फाटीं नासले. ते अशें कितें तरी उबें करताले जाका खरो अर्थ आसा, अशें तंत्रज्ञान जें सगळ्यां खातीर काम करता, ताच्या पुतासारख्या लोकां खातीर लेगीत जें जगाक वेगळे नदरेन पळयता.
सीईओ जाले उपरांत जेन्ना नाडेला झैन हाका मेळपाक आयसीयूंत गेले, तेन्ना तांच्या लक्षांत आयलें की ताच्या पुताक जिवो दवरपी सगळीं उपकरणां विंडोजचेर चलतालीं आनी
क्लावडाक जोडिल्लीं आसलीं. तेंच तंत्रज्ञान जे ताची टीम दरेक दीस घडयताली. तेन्ना तांचो हो ‘मिशन’ जैतीवंत जालो.
फकत मार्केट शेअर न्हय , फकत शेअरची किंमत न्हय. लोकांचें जिवीत सुदारपी तंत्रज्ञान तयार करप. फेब्रुवारी 2022 त, 26 वर्सांच्या पिरायेचेर झैन सोंपलो. नाडेला कुटुंबान सिएटल चिल्ड्रन्स हॉस्पिटलाक 15 मिलियन डॉलर्स दान दिले. लोकांक नाडेलाच्या काणयेंतलें एक मुखेल तत्व समजना. ताणें मायक्रोसॉफ्टाक खंयच्याच शाळेंत शिकिल्ल्या बिझनेस स्ट्रॅटेजीन बदललें ना. ताणें तें आपल्या पुता कडल्यान शिकिल्ल्या एका गुणान बदललें. सहानुभूती (Empathy).
दुसऱ्याच्या दोळ्यांतल्यान जग पळोवपाची तयारी. स्वताचीं मतां थारावचे पयलीं आयकुन घेवप. फकत फायद्या खातीर न्हय, तर लोकां खातीर उबें करप. हैदराबादचो एक भुरगो जाका क्रिकेटर जावपाचें सपन आसलें. इलेक्ट्रिकल इंजिनीअरिंगची पदवी घेवन जो अमेरिकेक आयलो. ज्याणें 22 वर्सां एकाच कंपनींत कश्ट केले. जो आपल्या कारकिर्दीतलो सगळ्यांत महत्वाचो धडो खंयच्याच बोर्डरुमांत न्हय, तर हॉस्पिटलाच्या एका कुडींत शिकलो. ज्या कंपनीक सगळ्यांनी बाद केल्ली, तीच कंपनी ताणें जगांतली सगळ्यांत मोलादीक कंपनी केली. तुमी खंयच्या आव्हानाक कारण म्हणून वापरतात की इंधन म्हणून? नाडेलान आपल्या पुताक जगा कडेन संवादा खातीर दरेक दीस झुजताना पळयलें.
आनी त्या दुखान ताका मोडलें ना, तर ताका परतून घडयलें.
तो त्या दुखा पसून पळ्ळो ना. ताणें त्या दुखाकडून शिकलो. तुमचो सगळ्यांत कठीण काळ घडये तुमकां कोणाकच आडावंक येना असो बनोवंक शकता. तुमचो सगळ्यांत
व्हडलो संघर्श तुमचें जिवीत बदलपी धडो जावंक शकता. परिस्थिती बरी जावपाची वाट पळोवप सोडात. जिवितान जें शिकयलें, ताच्या आदारान फुडारपण करा. कधी कधी व्हडले बदल स्ट्रॅटेजींतल्यान येतनात. ते सहानुभूतींतल्यान येतात. आनी केन्नाकेन्नाय जग बदलपी मनीस तोच आसता, जो पयले फावट दुसऱ्याच्या दोळ्यांतल्यान जग पळोवपाक शिकता. व्हड विचार करात !!!!.

दामोदर आठलेकार