भांगरभूंय | प्रतिनिधी
म्हापशेंः पिळर्णांतल्या यशवंत इमारतींतल्या फ्लॅटांत उजो लागून सुमार देड लाखांचें लुकसाण जालें. हे दुर्घटनेत तेजल तुळशीदास नायक (74) जखमी जाली. तिचेर जीएमसींत उपचार चलतात. एअर कुलराचो स्फोट जाल्ल्यान ही दुर्घटना घडली.
शेनवारा सकाळीं साडे सात वरांचे सुमाराक ही घडणूक घडली. जखमी तेजल नायक सकाळीं उठून च्या करपाक रांदचे कुडींत गेल्ली. त्या वेळार थंयच्या एअर कूलराक शॉर्ट सर्किटाक लागून किट उसळ्ळी आनी फ्लॅटाक उजो लागलो.
हातूंत तेजल नायक लासून जखमी जाली. शेजारच्या फ्लॅटांत रावपी तिच्या पुतान थंय वचून तिका उज्यांतल्यान भायर काडली आनी जीएमसींत व्हेली. त्या वेळार नायक हांची नात घरांत न्हिदिल्ली. स्फोट जाले बरोबर ती फ्लॅटांतल्यान धांवून भायर गेली, देखून तिका कसलीच दुखापत जाली ना.
घडणुकेची म्हायती मेळ्ळ्या उपरांत पिळर्ण उजो पालोवपी दळाचे अधिकारी दामोदर पेडणेकार, हवालदार रामा नायक, प्रल्हाद कोटकार, निखिल सावळ, श्रीकांत सावंत, मनोज महाले आनी राजकिरण पेडणेकार हांणी थंय वचून उजो नियंत्रणांत हाडलो.
उज्यांत रांदचे कुडींतली उपकरणां, टिव्ही आनी हेर घरगुती वस्तू लासिल्ल्यान सुमार देड लाख रुपयांचें जालें. साळगांव पुलिसांनी घडणुकेचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
