भांगरभूंय | प्रतिनिधी
सर्वोच्च न्यायालया कडल्यान गंभीर दखल
भांगरभूंय । प्रतिनिधी
पणजीः गोंय राज्य गिरायक कागाळ निवारण आयोगाच्या अध्यक्षांचे पद अजून मेरेन रितें आशिल्ल्या कारणान सर्वोच्च न्यायालयान हाची गंभीर दखल घेतल्या. उच्च न्यायालयाच्या एका न्यायाधीशाक आयोगाचो अध्यक्ष म्हूण दोन सप्तकां भितर नियुक्त करची आनी प्रलंबित प्रकरणा तीन म्हयन्या भितर निकालांत काडपाचो आदेश न्यायालयान दिला.
सर्वोच्च न्यायालयान उत्तर प्रदेश गिरायक निवारण आयोगाच्या वांगड्यांचो पगार आनी भत्तो ह्या प्रकरणाचेर सुनावणी करतना हेर राज्यांतल्या आयोगात प्रलंबित आशिल्ल्या प्रकरणांची आपूण जावन दखल घेतिल्ली. हातूंत गोंय राज्य आयोगाचो आस्पाव आशिल्लो.
हे विशीं सर्वोच्च न्यायालयान आपल्या आदेशात गोंय राज्य गिरायक कागाळ निवारण आयोगात रितें अध्यक्ष पदाची गंभीर नोंद घेवन आयोगाचे कामकाज सुरळीत चलचे हे खातीर ताकतिकेचे निर्देश दिल्यात. हे पद रितें आशिल्ल्या कारणान गिरायकांची कागळ निवारण करपाचे प्रक्रियेक फटको बशील्यांचे न्यायालयान नमूद केला.
न्यायालयान आपल्या आदेशात म्हणलां, सद्या गोंय राज्य आयोगा मुखार 39 कागाळी आनी याचिका प्रलंबित आसात. पूण ह्या आयोगात उच्च न्यायालयाचे सद्याचे वा आदले न्यायाधीश अध्यक्ष पदार नियुक्त जावंक नात. ह्या कारणाक लागून गिरायकांक न्याय मेळपा खातीर अडचणी तयार जावपाक शकतात.
देखून राज्य आयोगातल्यो प्रलंबित कागळी आनी याचिका हांची कागदापत्रां दोन सप्तकां भितर उच्च न्यायालायच्या रजीस्ट्रार जनरलाकडेन सुपुर्त करपाचे निर्देश दिल्यात. उपरांत उच्च न्यायालयाचे सरन्यायाधीशांनी एका न्यायाधीशांक अध्यक्ष म्हूण नियुक्ती करचो आनी अस्तिवांत आशिल्ले तांत्रीक वांगड्या सयत ही प्रकरणा जाता तितले बेगीन तीन म्हयन्या भितर निकालांत काडची अशे निर्देश सर्वोच्च न्यायालयान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
