भांगरभूंय | प्रतिनिधी
पणजीः मंत्री विश्वजीत राणे हांच्या दोना पावलच्या घराचेर मोर्चो व्हेल्ल्या प्रकरणांत पणजी पुलिसांनी विरोधी फुडारी युरी आलेमांव, आमदार कार्लोस फेरेरा, वेन्झी व्हिएगस, क्रूझ सिल्वा, आरजीपी अध्यक्ष मनोज परब हांचे सयत 1200 ते 1500 लोकां आड एफआयआर दाखल केला. हातूंत बेकायदेशीर आंदोलन करप, मंत्री राणे हांच्या घराचेर चलून वचप, रस्तो आडावन आठ वरां येरादारींत आडखळ हाडप अशीं कारणां दिल्यांत.
फाटल्या शेनवारा आमदार विरेश बोरकार हांणी सांत आंद्रे मतदारसंघांत कलम 39 अ खाला प्रस्तावीत झोन बदल रद्द करपाची मागणी केल्ली. तांणी पाळे शिरदोनच्या थळाव्यां वांगडा खात्याच्या पाटो वयल्या कार्यालयांत थंयच बसून आंदोलन केलें. ह्या वेळार पुलिसांनी आमदार बोरकार हाका जबरदस्तीन कार्यालयांतल्यान ओडून भायर काडलो. हाचे उपरांत बोरकार हांणी आपली मागणी पुराय जायसर आमरण उपोशण करपाचो निर्णय घेतलो. ताका काँग्रेस आनी आप आमदारांनी तेंको दिलो.
ते प्रमाण सोमारा 23 फेब्रुवारीक नगर नियोजन कायद्यांतलो कलम 39 अ रद्द करपाची मागणी करपा खातीर आझाद मैदान ते राणे हांच्या घरा मेरेन मोर्चा काडलो. आंदोलक कितलीशीच वरां राणे हांच्या निवासस्थाना मुखार बसून रावले. बुधवारा जाल्ले भाजपाचे कोर कमिटीचे बसकेंत हो विशय आयलो. हाचे उपरांत मुख्यमंत्री डॉ. प्रमोद सावंत हांणी मंत्र्याच्या घराचेर मोर्चो काडपाचो निर्णय चुकीचो आसा अशें सांगलें. आंदोलनांत वांटो घेवप्यां आड कारवाय करतले अशीय शिटकावणी तांणी दिल्ली.
हाचे उपरांत आंदोलनांत वांटो घेवपी लोकांक नोटीसी येवपाक लागल्या. हातूंत तांकां पणजी पुलीस स्टेशन, ताळगांव पुलीस आउट पोस्ट वा दोना पावला पुलीस आउट पोस्ट हांगा येवन मेळपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
