भांगरभूंय | प्रतिनिधी
पणजीः फाटलीं कांय वर्सां गोंयांतल्या एससी समाजाक जाती प्रमाणपत्रां दितना तात्पुरतें असो उल्लेख जाता. हाका लागून समाजांतल्या लोकां खातीर समस्या निर्माण जाल्यात. देखून एससी समाजाक हेर समाजां प्रमाण कायमस्वरूपी जात प्रमाणपत्रां दिवचीं अशी मागणी काँग्रेस एससी विभागाचे अध्यक्ष विठू मोरजकार हांणी केल्या.
शेनवारा पणजे जाल्ले पत्रकार परिशदेंत ते उलयताले. ह्या वेळार एससी विभाग गोंय समन्वयक अश्विनी खोब्रागडे आनी आयुष केरकार हाजीर आशिल्ले. हाचे पयलीं मामेलदार कार्यालयांतल्यान एससी समाजांतल्या लोकांक जात प्रमाणपत्र दिताले. मामेलदार कायमस्वरूपी जात प्रमाणपत्र दिताले.
हाका लागून समाजांतल्या विद्यार्थ्यांक वा हेर लोकांक परत परत फावटी मारच्यो पडटाल्यो. पूण उपरांत ही प्रक्रिया बदलली. समाज कल्याण खात्याक जात प्रमाणपत्र दिवपाचो अधिकार दिलो. ते खातीर धा जाणांची छाननी समिती तयार केली. समिती मेळिल्ल्या अर्जांचेर निर्णय दिताली.
पूण कांय काळा उपरांत समाज कल्याण खात्या कडल्यान हो अधिकार काडून घेतलो. सध्या उपजिल्होधिकारी जात प्रमाणपत्र दिता. ह्या प्रमाणपत्रां सकयल तात्पुरतें अशें बरयलां म्हणून समाजांतल्या लोकांक त्रास जाता. हाचे भायर सरकारान एससी, एसटी आयोग आनी एससी ओबीसी विकास म्हामंडळाची स्थापना केल्या.
पूण ह्या दोनूय संस्थांनी एससी समाजाक अजून फावो तें प्रतिनिधित्व मेळूंक ना. फाटलीं कितलींशींच वर्सां राज्यांत भाजपा सरकार सत्तेर आसा. पूण एससी समाजांतले प्रस्न सुटावे जावंक नात असो आरोप मोरजकार हांणी केलो.
फाल्यां समाजाचो मेळावो
गोंयांतलो पेडणें मतदारसंघ एससी समाजा खातीर राखीव आसा. मोपा विमानतळ, आयुश हॉस्पिटलांत एससी समाजाक प्राधान्यान नोकऱ्यो मेळप गरजेचें आसा. एससी समाजाच्यो समस्या समजून घेवन ताचेर उपाय सोदून काडपा खातीर 1 मार्चाक काँग्रेसीच्या पणजी कार्यालयांत खाशेलो मेळावो घडोवन हाडला अशें अश्विनी खोब्रागडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
