भांगरभूंय | प्रतिनिधी
पणजीः सांत आंद्रेचे आमदार विरेश बोरकार हांची भलायकी सुदारिल्ल्यान तांकां आयज हॉस्पिटलांतल्यान डिस्चार्ज दिलो. हॉस्पिटलांतल्यान भायर सरले उपरांत तांणी प्रसार माध्यमां कडेन संवाद सादतना खूब आक्रमक भुमिका घेतली. भलायकेक लागून कांय काळ सक्रीय राजकारणा पसून पयस रावचें पडिल्ल्यान हांव थकला अशें दिसलें आसूं येता. पूण आतां पुराय बळग्यान मौदानार परतून देंवतलो आनी वादग्रस्त कलम ‘39-अ’ आड परतून नव्या उर्बेन झूज सुरू करतलो अशें बोरकार हांणी स्पश्ट केलें.
आमदार बोरकार हांणी फुडें म्हणलें, गोंयच्या जमनीची राखण करप हें आमचें सगळ्यांत व्हडलें कर्तव्य. टीसीपी कायद्याच्या कलम 39-एचो उपेग करून सरकार पर्यावरणाचो नाश करता आनी थळाव्यांची जमीन बळकावपाचो यत्न करता. ह्या बेकायदेशीर जमनीच्या रुपांतराक लागून गोंयचें अस्तित्वूच धोक्यांत पडलां. भलायकी इबाडिल्ल्यान फाटले कांय दीस शारिरीक रितीन ह्या लढ्यांत हाजीर रावंक मेळूंक नाशिल्लें. पूण म्हजे कार्यकर्ते आनी गोंयकार झूज मुखार व्हरताले. आतां भलायकी स्थीर जाल्ल्यान परत एक फावट रस्त्यार देंवून अन्यायाचो जाब विचारतलो असो खर विस्वास तांणी उक्तायलो.
आतां 39 ए आड झूज चड खर जातलें. लोक जागृत जाल्यात, देखून हेर आमदारांनी तांकां तेंको दिलो ना जाल्यार लोक स्वताच तांकां जाब विचारतले. विधानसभेंत हे कलम रद्द जालें ना जाल्यार ते उपरांत लेगीत झूज चालू उरतलें अशेंय तांणी सांगलें. ह्या वेळार तांणी कलम 39-एच्या नांवान चालू आशिल्ल्या भ्रश्टाचाराचेर खर टिका केली. हो संघर्श फकत मातये खातीर आनी फुडल्या पिळगेच्या फुडारा खातीर चालू उरतलो अशेंय तांणी आश्वासन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
