भांगरभूंय | प्रतिनिधी
पणजीः प्राची शिरोडकार हांणी दिग्दर्शित केल्लो गोंयचो माहितीपट ‘भांगर कलाकुसर कारिगिरी’न कोलकाता जाल्ल्या अमादेर आंतरराष्ट्रीय लघुपट महोत्सव 2026 त उत्कृश्ट माहितीपट पुरस्कार जिखलो. प्राची हांकां उत्कृश्ट दिग्दर्शक ‘फेस्टिव्हल मेंशन’ हो भोवमानूय मेळ्ळो. तांच्या कलात्मक उत्कृश्टताय, स्पश्ट दृष्टिकोन आनी प्रभावी कथानका खातीर महोत्सवाच्या ज्यूरींन हो माहितीपट निवडलो.
प्राची हांणी ह्या माहितीपटाचें चित्रीकरण, दिग्दर्शन आनी कथन केलां. जाल्यार संपादन मारिओ पिमेंटा हांणी केलां. ह्या चित्रपटांत ज्येश्ठ कारागीर वीरेंद्र रिवणकार, रशिला शिरोडकार आनी प्रणय शिरोडकार हांची मुलाखत आसा. हरेश शिरोडकार हांणी पटकथा सल्लागार म्हूण कथानक रचनेक आकार दिला. हो माहितीपट गोंयच्या पारंपरिक सुवर्णकार कारागिरांची कला उजागर करता.
पर्वरेची 28 वर्सां पिरायेची चित्रपट निर्माती प्राची शिरोडकार हिणें मिसेन्टेज इंडियन फिल्म ॲवॉर्ड्सांतलो बेस्ट डॉक्युमेंटरी आनी गोवा आंतरराष्ट्रीय फिल्म फेस्टिवलांतलो बेस्ट स्टुडंट डॉक्युमेंटरी अशीं जायतीं राष्ट्रीय आनी आंतरराष्ट्रीय महोत्सवांत इनामां मेळयल्यात. सध्या ती सहाय्यक दिग्दर्शक आनी कला दिग्दर्शक म्हणून काम करता. तेच बरोबर तिची चित्रपट निर्मिती कुशळटाय सेगीत निखारता. तशेंच ती एक अभिनेत्री आनी व्हिज्युअल आर्टिस्ट आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
