‘आपा’क थाकाय

भांगरभूंय | प्रतिनिधी

आम आदमी पक्षान कोट्यांनी रुपयांची लांच घेवन तो पयसो गोंय वेंचणूक प्रचाराक वापरलो, असो आरोप जाल्लो.

साडेतीन वर्सां पयलीं गाजिल्लें दिल्लींतलें सोरो धोरण काल परत उफेलें. कारण जालें विशेश न्यायालयान मुखेल दुबावीत आदले मुख्यमंत्री अरविंद केजरीवाल आनी उपमुख्यमंत्री मनिश सिसोदिया हांकां दिल्ली क्लीन चीट. हेर 21 दुबावितांकूय सगल्या आरोपांतल्यान निर्दोश मुक्त केल्यात. कायदो आनी राजकी मळा वयली ही म्हत्वाची घडणूक. ‘हे केशीची बुन्यादूच दुबळी आसा’, अशे म्हणीत न्यायालयान तपास यंत्रणेचेर चाबूक मारला. सीबीआय, ईडीन ह्या निकालाक आव्हान दिलां. थंय बळिश्ट पुरावे मेळत जाल्यार वेगळो निवाडोय घडये येत, पूण ह्या प्रकरणान तपास यंत्रणा, न्यायसंस्था आनी सत्तासंघर्श हांचे मदलें नातें प्रसारमाध्यमांनी चर्चेक आयलां. आप समर्थक म्हणटात, ‘आमी कट्टर इमानदार’, तर विरोधक म्हणटात, ‘तांत्रिक पुरावे नाशिल्ल्यान ते सुटले’.
2021 त दिल्ली सरकारान खाजगीकरणाच्या माध्यमांतल्यान सोरो विक्री वेवस्था सुदारपाक नवें अबकारी धोरण लागू केलें. तेन्ना, कांय खाजगी कंपनींक फायदो मेळोवन दिवपाक परवानो शुल्कांत सूट दिवन लांच घेतिल्ल्याचे आरोप जाले. दिल्लीचे नायब राज्यपाल व्ही के सक्सेना हांणी सीबीआय चवकशीची शिफारस केली आनी हें धोरण रद्द केलें. ‘आमी न्हय, राज्यपालान तें रद्द केलां’, अशें सिसोदिया म्हणटात. आम आदमी पक्षान कोट्यांनी रुपयांची लांच घेवन तो पयसो गोंय वेंचणूक प्रचाराक वापरलो, असो आरोप जाल्लो. सत्येंद्र जैन (मे 2022), सिसोदिया (फेब्रुवारी 2023), संजय सिंह (आॅक्टोबर 2023) आनी केजरीवाल (मार्च 2024) हांकां अटक जाल्ली. हे फुडारी आनी हेर कांय जाण बरोच काळ बंदखणींत आशिल्ले. हे घडणुके उपरांत सिसोदिया, केजरीवाल आनी एकूणच आम आदमी पक्ष देशभरांत बदनाम जालो. दिल्लींत तर उध्वस्त जालो.
न्यायालय म्हणटा, ‘हे केशींत मुळावो दुबाव घेवपा सारकें कांयच ना. पुरावे नाशिल्ल्यान ती कायद्यान दुबळी थारता. सोरो धोरण सल्लो घेवन कायदेशीर प्रक्रिये प्रमाण केल्लें. तथ्यांचे बुन्यादीर आदार नाशिल्ली काणी रचप कायद्याक मान्य ना. पुराय केश अदमास आनी तर्कांचेर आदारीत आशिल्ली. आपणे पयलींच काडिल्ल्या निश्कर्शाक फाटबळ दिवपाक तपास यंत्रणेन तथ्यांची मांडणी केली. तपास अधिकाऱ्यान तथ्यां कडेन आडनदर केली. ताचेर विभागीय कारवाय जावची.’ निकालांत सामान्य मत माथाळ्या खाला (जनरल ओपिनियन) ‘दुबावीत इमानदार’ असो उल्लेख आसा. मात आदेशांत ना. हाचेरुय प्रसारमाध्यमांनी वाद सुरू जाला.
सीबीआय, इडी सारक्या संस्थांचेर राजकी चेपण आसता, असो आरोप सदांच जाता. न्यायालयान सीबीआयचो उल्लेख 2013 त ‘पांजऱ्यांतलो पोपट’ असोय केल्लो. जर गुन्यांव फट सिद्ध जालें जाल्यार संबंदीत यंत्रणे आड न्यायालयीन कारवाय, लुकसाण भरपायेचो दावो करपाक मेळटा. पूण ही दुर्मीळ घडणूक. काँग्रेस, भाजपा सरकारांनी बऱ्योच भानगडी उक्तडार हाडल्यात. तातूंतल्यो सुखराम (दूरसंचार) आनी लालुप्रसाद यादव (गोरवां खावड) ह्यो सोडल्यार हेर प्रकरणांनी कोणाक खर ख्यास्त जावंक ना. 2 जी स्पेक्ट्रम, कोळसो खणीं वांटप, दिल्ली राष्ट्रकूल खेळां सर्त, राफायल खरेदी, बोफोर्स, नॅशनल हेराल्ड..!! सामके गंभीर आरोप तर शेंकड्यांनी जाल्यात. पूण कालांतरान तेय पोल जावन वाऱ्यार उडून गेल्यात. पक्षांंतर, अर्दवट तपास, मिडिया ट्रायल, वेंचणुके पयलीं प्रतिमा इबाडप, राजकी सुडभावना, विरोधकाक बागोवपाक, अशा साबार कारणाक लागून आरोप जातात, चवकशी जाता. मुखार ख्यास्त जाताच अशें ना. राजकारणांत आरोप हे शस्त्र म्हूण वापरपीय आसात. न्यायवेवस्था ‘दोश सिद्ध जाय मेरेन निर्दोश’, ह्या तत्वाचेर चलता. तरीय आरोप करून ते सिद्धच जावंक नात जाल्यार संंबंदीत तपास यंत्रणेचेर केशी चल्ल्यात? कोणाक खर ख्यास्त जाल्या?? चुकीचे केशी खातीर लुकसाण भरपाय कायदो केल्यार बरें न्हय??