म्हापालिका कायदो सुदारपाची गरज

भांगरभूंय | प्रतिनिधी

तलवारीचें झुज म्हापालिका वेंचणुकेंत जावचें ना हाची जतनाय सरकार, वेंचणूक आयोगान घेवची. वेंचणुकेचें झुज खर जाता तेन्ना शाराचो एकवट दिसचो.

राज्यांत एकूच म्हापालिका आसा, तीय राजपाटण पणजेंत. पुर्तुगेजांच्या तेंपा वयले पणजे नगरपालिकेचो शेंकडो जालो, म्हापालिका रुप्यां उत्सवी वर्सांत पावल्या. कित्याक जाली पणजी नगरपालिकेची म्हापालिका पणजे परस हेर शारां व्हड आसूनय? ताळगांव उदरगतींतल्यान शार जावपाचे वाटेर आशिल्लें. थळावे पंचायतीक तें पंचायत उरचें अशें दिसतालें. निमणे ताळगांवांतलो शारावरी जाल्लो वाठार म्हापालिकेंत कायद्यान आसपावन पणजी म्हापालिका जाली. महाराश्ट्रांतल्या नागपूर म्हापालिकेच्या कायद्यांत बदल करुन रातयां जाल्ल्या पणजी म्हापालिका कायद्याच्या पुस्तकांत बऱ्यो तजवीजो आसात. पुराय कायदो चालीक लावपाक, म्हापालिकेच्या प्रशासकी कामकाजा पासत नेमावळ करपाची गरज उपरासल्या. म्हापालिकेची नवी बिल्डिंग बांदप ही मोख वेंचून येवपी नगरसेवकां मुखार आसची. पांच वर्सां भितर आसा तेच सुवातींत आदल्या आराखड्यांत बदल करुन नवे बिल्डिंगेत म्हापालिका कामाक लागपाक जाय.
अंदूच्या अर्थसंकल्पांत मुरगांव, म्हापसा, मडगांव म्हापालिका, स्मार्ट सिटीचें उतर मेळटलें अशी आस्त बाळगूया.
शारांतल्या कोयर वेवस्थापनात बरो वावर पणजी म्हापालिकेन केला. वेवस्थापन आनीक स्मार्ट जावचें नागरिकांक वांटेकार करुन घेवन. शार सांबाळपा पासत नागरीक समित्यो करपाचें जाहीरनाम्यातलें उतर कोयर वेवस्थापन मंत्री बाबुश मोन्सेरात हांणी फुडारांत पाळचें. नवें स्मार्ट शार पणजे लागसार जालां. त्या शारा पासत उदक, बिजलेची वेवस्थाय जाल्या. नवे दोन वाॅर्ड थंय जल्माक येवंक जाय आशिल्ले ते वाॅर्ड फेररचणुकेंतल्यान जावंक येतात.
म्हापालिका वेंचणुकेंत मतदान करतना उमेदवारांचें शिक्षण, पिराय, अणभव मतदारांनी जोखचो. मतदारांच्या दारांत उमेदवार वेंचणुके उपरांतय भोंवतले, मतदारांक मेळटले अशें उतर जाहीरनाम्यांत मेळचें. वेंचणुकेतल्या उमेदवारांक शेणिल्ले मतदार, नवे मतदार, खोंपींतल्यान बिल्डिंगेंत गेल्ले मतदार सोदून काडपाक वगत आसतलो व्हय? मतदार वळेरी राजभासेंतल्यान दितना ती अचूक आसतली ही जतनाय आयोगान घेवची.
म्हापालिका वेंचणुकेंत तरणाटे आसात, कित्याक तरनाट्यांक, अस्तुरेक वेंचणुकेच्या झुजांत देंवचें दिसलां? म्हापालिका कायदो, वाॅर्डातलीं घरां, घराभोंवतणचो वाठार, मतदार उमेदवाराच्या वळखीचो आसा? म्हापालिका वेंचणुकेत जिखून येवपी उमेदवारांनी उपरांत राजकारण कुशीक दवरचें पडटलें. शाराच्या बऱ्या खातीर, स्मार्ट पणजे खातीर एकवटान वावुरपाचो सोपूत घेवचो पडटलो. थिरायेंतल्यान म्हापालिकेचो वाठार स्मार्ट जालो तरी नव्यो सुविधा रोखड्यो मोडपाची, तोडपाची गरज कित्याक उपरासल्या? ती म्हायती मुख्यमंत्री, नगर विकासमंत्री, कोयर वेवस्थापन मंत्र्यांनी दिवची. पक्षांतरबंदी कायद्याची तजवीज म्हापालिका कायद्यांत आसा? पक्ष चिन्हाचेर वेंचणूक जाल्ली ना ती तजवीज फुडारांत करची.
विधानसभा वेंचणुके आदीं म्हापालिका, पंचायत, जिल्हो पंचायत कायद्यांत बदल घडोवन हाडपाचें उतर मतदारांक सरकारान दिवचें. म्हापालिका वेंचणुकेंत चार पांच आदले म्हापौर, उप म्हापौर आसात. बापायच्या राजकी दायजांतल्यान पूत, धुवो वेंचणुकेंत मुखार सरतात तेन्ना तांकां आपली वळख सांगची पडटली. म्हायती तंत्रगिन्यान जितल्या बेगीन बदलता तितले वेगीं तें आपणावपी राजकारणी कितले आसात?
फोंडा विधानसभा पोट वेंचणुकेंत वयलेचाराक एकवटान देंवपाची भास करपी विरोधी राजकी पक्ष 2026 चे विधानसभा वेंचणुकेंत एकठांय आसतले? पणजे म्हापालिकेचे वेंचणुके खातीर विरोधी पक्षाचो तेंको कोणाक आसा? एके माचयेर सगले विरोधी पक्ष एकठांय आयले तरी वेंचणुकेच्या उपरांत नेतृत्वा वेल्यान झगडीं नासतलीं? उतर मेळटलें विरोधी पंगडा कडल्यान? काल पक्षांतराक येवकार दिवपी वेंचणुकेचो प्रचार करतना समाजमनाचो अभ्यास करुन रातयां रकाद धाडचेना अशें न्हय. पक्षांतरांतल्यान थिराय मेळ्ळी, फाटीं पडिल्ले मुळावे परतून एक जाल्यात, तोच एकवट फुडारांत दिसतलो?
म्हापालिका वेंचणुके वगतार राती ल्हान जातल्यो, प्रचाराचे दीस उणे आसात, घरांचेर बॅनर्स लागतले. घराघरांनी मतदारांक सोदूंक वचपी उमेदवार कितले आसात? मतदान केंद्रा मेरेन वचूंक शकना अशेय मतदार आसतले, तांचे खातीर सुविधांची निर्मणी जाल्या? आदलीच मतदार वळेरी मतदानाक उपेगांत हाडटले तें राज्य वेंचणूक आयोगान कळीत करप समा जातलें. मतदार वळेरेची फेररचणूक करतना कांय मतदार दुसऱ्या वाॅर्डात घाल्या आसतले. मतदार वळेरी सुदारपाचें काम अजून चालू आसा.
म्हापालिका कायदो चालीक लावपा पासत आदले म्हापौर सुरेंद्र फुर्तादो हांच्या कार्यकाळांत केल्ली नेमावळ चालीक लॉगचे आदींच शेळी जाल्ली आसतली. तेच नेमावळींत बदल करपाची तांक आशिल्ले गोंय प्रदेस काँग्रेसींतले अॅड. यतिश नायक आयज भाजपांत आसात. खासा गोंयचो म्हापालिका कायदो करपाक ते भाजपाक मजत करतले. पयली पणजी म्हापालिका आदले नगरपालिका अध्यक्ष, नगरसेवकांक भितर घेवन जाल्ली. म्हापालिका अध्यक्ष जाल्या उपरांत जाल्ले पयले वेंचणुकेंत पणजे मतदारसंघातले मतदार नगरसेवक म्हापालिकेंत चड आशिल्ले. पणजेच्या आमदारांनी तेन्ना आनी आयजय केल्ल्या पंगडांत पयलींचे कांय नगरसेवक, म्हापौर आसात. पणजेचे आमदार जावपाची तांक एक दोन नगरसेवकांत आसा. नव्या मुखामळां मदीं शिकिल्ली अस्तुरी आसा. म्हापौर म्हणून पणजे मतदारसंघातली वेंचून आयिल्ली अस्तुरी आसल्यार पणजी मतदारसंघ भाजपाचो उरतलो.
पणजी म्हापालिका वेंचणुकेच्या प्रचारांत स्टार प्रचारक म्हणून मुख्यमंत्री डाॅ. प्रमोद सावंत आसतले. प्रदेसाध्यक्ष दामोदर नाईक, खासदार सदानंद शेट तानावडे, केंद्रीय मंत्री श्रीपाद नाईक हांचोय स्टार प्रचारकांत आसपाव आसतलो. जिल्हो वांगडी सिद्धेश नाईक स्टार प्रचारक म्हणून रायबंदर वाॅर्डांतल्यान वावुरतले. मुळचे भाजपा कार्यकर्ते उमेदवार वेंचून हाडपाची तांक तांकां आसा. उत्पल पर्रीकार वाड्यावाड्यांनी भोंवल्यार तांकां पणजी कितली बदल्ल्या, मतदार दुसऱ्या घरांनी रावंक गेल्यात हें कळटलें. आपले इश्ट, दुस्मान वळखुपाक तांकां येवपाक जाय. तांचे इश्ट कोयर वेवस्थापन मंत्र्यांच्या पंगडांत दिसतात.
पणजी म्हापालिका बदलांतल्यान स्मार्ट जाल्या, शिस्त आयल्यार येणावळ वाडटली. येणावळी पासत नव्यो येवजणी पणजी म्हापालिका करुंक शकता. स्मार्ट सिटींतल्यान येणावळ, रोजगाराच्यो सुविधा वाडोवपाचे येत्न म्हापालिकेन करपाची गरज आसा. स्मार्ट सिटींतल्यो सुविधा शारांत आशिल्ल्यान त्यो पत्र बरोवन नव्या म्हापौरांनी पणजे म्हापालिकेक दिवपाची गरज उक्तावची.
म्हापालिका वेंचणुकेंत उमेदवार कित्याक उणे जाल्यात? थेट सर्त जावची अशें मतदारांक दिशिल्ल्यान उमेदवारी अर्ज चड आयले ना ? पणजी म्हापालिका वेंचणुकेतले मतदार पणजी विधानसभा मतदारसंघांतलेच न्हय ताळगांव मतदारसंघातले आसात. तलवारीचें झुज म्हापालिका वेंचणुकेंत जावचें ना हाची जतनाय सरकार, वेंचणूक आयोगान घेवची. वेंचणुकेचें झुज खर जाता तेन्ना शाराचो एकवट दिसचो.

सुहासिनी प्रभुगांवकार
9881099260