आपाचो न्यायालयांत सत्याचो विजयः वाल्मिकी नायक

भांगरभूंय | प्रतिनिधी

भांगरभूंय । प्रतिनिधी
पणजीः भाजपान विरोधी फुडाऱ्या वांगडा खुबशीं षडयंत्रा करून तांकां वॉशिंग मशीनांत नितळ केलें. पूण आम आदमी पक्षाचे फुडारी ताका बळी पडूंक नात. तांणी बंदखणींत रावून लढो दिलो आनी न्यायालयांत तांच्या सत्याचो विजय जालो, अशें आम आदमी पक्षाचे गोंय संयोजक वाल्मिकी नायक हांणी म्हणलें.
दिल्ली कथित सोरो घोटाळो प्रकरणांत दिल्ली न्यायालयान दिल्लीचे आदले मुख्यमंत्री अरविंद केजरीवाल आनी आदले शिक्षण मंत्री मनीश सिसोदिया हांची निर्दोश सुटका केली. ह्या निर्णयाक येवकार दित पणजे आपच्या वावुरप्यांनी जैत मनयले. ह्या वेळार नायक उलयताले.
केजरीवाल सरकार उडोवपा खातीर उंचेल्या पांवड्यार हे षडयंत्र रचिल्ल्याचो आरोप नायक हांणी केलो.
10 वर्सा दिल्लीच्या केजरीवाल सरकारान इतले बरे काम केले की ते सरकार उडोवपाक शक्य जालें ना. देखून ह्या सरकाराक उडोवपाक आनी आपाक काबार करपाक हे षडयंत्र केले. हीं आमचे वांगडाच करूंक ना तर कितलेशेच फुडाऱ्या वांगडा केल्या. पूण ते चडशे भाजपाच्या वॉशिंग मशीनान वचून नितळ जाले. पूण आमचे फुडारी आपल्या तत्वाक दसून उरले आनी बंदखणींत वचपाचो निर्णय घेतलो. आयज कोर्टात तांच्या सत्याचो विजय जाला, अशे नायक हांणी सांगलें.
इतले वर्सा आमी खूब सोंसले. ह्या प्रकरणाचो गोंयां कडेन सबंद जोडपाचो यत्न जालो. आमी जे कितले म्हणला ते सत्य आसा हे लोकांक आयज समजून आयलां. सुरवाती पसून ही केस फटीची आसली आनी न्यायालयान दिल्ल्या निवाड्यांत हें सिद्ध जालां, अशें मत नायक हांणी उक्तायलें.
एमस्ट्रोग डिस्टिलरीचो एक ट्रक पडलो तेन्ना अबकारी खात्यांत आंदोलना वेळार सोरो धोरणाचें नांवान आमकां थोमणे मारताले. पूण एमस्ट्रोग डिस्टिलरीचे प्रकरण अजून सुटावे जावंक ना आनी हें विधानसभेंत राज्य सरकाराच्या अबकारी धोरणाची आमी भांडाफोड करतले, अशी शिटकावणी आपचे आमदार वेन्झी व्हिएगस हांणी दिली.