भांगरभूंय | प्रतिनिधी
पणजीः येरादारी खात्यान राज्यांतल्या स्लिपर बसीं खातीर ओटोमॅटीव्ह इंडस्ट्री स्टेंडर्ड (एआयएस) 119 मार्गदर्शक तत्वां सक्तीचीं केल्या. हातूंत कॅबिना खातीर विभाजकी दाराची परवानगी रद्द करप, आणीबाणेचे मार्ग सक्तीचें करप तशेंच उजो पालोवपाची यंत्रणा कार्यान्वीत करप सारकिल्ल्यो अटी घाल्यात. 30 दिसां भितर ह्या अटींचे पालन सक्तीचें आसा, अशी कळोवणी येरादारी खात्यान काडला.
येरादारी खात्याचे संचालक पी. प्रविमल अभिषेक हांणी जारी केल्ले कळोवणेंत सांगलें, राष्ट्रीय मानवी हक्क आयोगाच्या निर्देशा प्रमाणा एआयएस 119 आनी रस्तो येरादारी खातीर केंद्रीय संस्थेच्या (सीआयआरटी) सगल्या सुरक्षा शिफारसींची पुराय अंमलबजावणी सुनिश्चीत करपा खातीर चार मुखेल अटींचें कसल्याच अपवादा बगर पालन करप सक्तीचें आसा.
हातूंत ड्रायव्हर कॅबिना खातीर विभाजक दाराक परवानी दिवचे नात. ड्रायव्हराची केबिन सदांच आडमेळीं विणें आसची. ड्रायव्हाराचें केंबिन कसल्याच आडखळी बगर पुरायपणान मेकळें आसप गरजेचें आसा. तशेंच 12 मिटर मेरेन लांबाय आशिल्ल्या सगल्या बसींक किमान चार आनी 12 मिटर परस चड लांबाय आशिल्ल्या बशीक पांच आणिबाणीचें मार्ग आसप सक्तीचें केला.
सगल्या स्लिपर कोचांनी उजो सोदून काडपाची आनी उजो पालोवपाची यंत्रणा बसोवप आनी ती चालू स्थितींत दवरप गरजेचें आसा. स्लीपर बसींक ‘स्लायडर्स’ आसपाक जायना, वाहनांच्या चेसिसांत कसलेच अनधिकृत बदल वा विस्ताराक मान्यताय ना. तशेंच, वाहनांची बॉडी पुरायपणान एआयएस-119च्या आकारमान आनी मांडणीच्या निकशां प्रमाण आसप गरजेचें आसा.
ह्या बसींनी गरजेची सुदारणां करपा खातीर 31 मार्च 2026 मेरेन अशीं 30 दिसांची मुजत दिल्या. नेमांचे पालन करिनाशिल्यो सगल्यो बसी रोखड्योच सेवेंतल्यान काडून उडयतले आनी प्रचलीत कायद्या प्रमाण दंड आनी कडक कारवाय करतले, अशी शिटकावणी येरादारी खात्यान कळोवणे वरवीं दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
