रस्ते अपघातांत दिव्यांग, खाटीर पडून आशिल्ले व्यक्तींची जातली नोंद

भांगरभूंय | प्रतिनिधी

उत्तर गोंय रस्तो सुरक्षा बसकेंत निर्णय

भांगरभूंय । प्रतिनिधी

पणजीः रस्ते अपघातांत दिव्यांग तशेच खाटीचेर पडून आशिल्ले लोकांचो डेटा एकठांय करपाक आतां सुरू करतले. तांची म्हायती मेळ्ळे उपरांत तांकां लुकसाण भरपाय, आर्थिक मजत आनी दिव्यांगाचे लाव दिवप सोपे जातले. हे विशींच्या निर्णयाक उत्तर गोंय जिल्हो रस्तो सुरक्षा बसकेत मान्यताय दिली.
अतिरीक्त जिल्होधिकारी गुरूदास देसाय हांच्या फुडारपणा खाला उत्तर गोंय रस्तो सुरक्षा समितीचे बसकेत भौशिक बांदकाम खात्याचें वांगडी सचिव जुड कार्व्हालो, लीड एजन्सीचे चेअरमन राजेश नायक, पुलीस उपअधिक्षक सुदेश वेळीप, अतिरीक्त येरादारी संचालक बी. ए. सावंत, शार उदरगत खात्याचें अतिरीक्त संचालक पंकज राणे, ट्रॅफिक जागृताय विभागाचे निरीक्षक सुरज सावंत, नेशनल इन्फोमेटीक्स सेंटरचे विराज बोरकार आनी गोवा कॅनचे समन्वयक रोलन्ड मार्टीन्स हाजीर आशिल्ले.
सद्या रस्ते अपघातांत मरण येतात तांचो आंकडो आनी म्हायती ही सरकाराकडेन आसा. पूण अपघाता उपरांत कोण घरा बसून आसा वा खाटीर पडून आसा हाची आंकडेवारी सरकाराकडेन ना, अशें रोलन्ड मार्टीन्स हांणी बसके उपरांत सांगलें.
देखून रस्ते अपघातांत गंभीर जखमी जावन जे व्यक्ती अंपगूळ जाल्यात, खाटीरच पडून आसात वा कोमात गेल्यात तांचो डेटा गोंय वैजकी महाविद्यालयातल्यांन घेवन ते एकठांय करपाक सुरू करतले. हे व्यक्तीक हीट अँण्ड रन अपघात येवजण 2022 खाला लुकसाण भरपाय दिवपाक मजत जातली. तशेंच हे अंपगूळ जाल्ले व्यक्तींक दिव्यांग कार्ड दिवन तांकां फावो ते लाव मेळटले अशी म्हायती मार्टीन्स हांणी दिली.
तशेंच उत्तर गोंयांत मरण आयिल्ल्या अपघातांच्या विश्लेशणाची फाटपुरवण करप, सोरो पियेवन गाडी चलोव नाकात, पर्यटन खात्याच्या उपक्रमाक तेंको दिवप, तशेंच मेरशी जंक्शन, अटल सेतू जंक्शन आनी बांबोळी जंक्शनाची पळोवणी करून रस्तो अभियांत्रीकी त्रुटी सोदप आनी उत्तर गोंय जिल्ह्यांत अतिरीक्त एम्ब्युलन्स उपलब्ध करून दिवपा विशींचे निर्णय बसकेत जाले.
बांबोळे फुलांतो खुर्सा लागसार फुट ओव्हर ब्रीजाच्या बांदाकामचो नियाळ घेतलो तशेंच पर्वरी उड्डाण पूल बांदकामाच्या उदरगतीचो अहवाल मागयलो आनी ट्राफिक सिग्नल जंकश्नाचेर कॅमेरा बसोवपाची दखल हे बसकेत घेतली.