भांगरभूंय | प्रतिनिधी
पणजी हें आमचें राजधानी शार. ताचो कारभार कोणी पळोवचो, कोणी तो चलोवचो हाचो निर्णय घेवची वेंचणूक फुडल्या म्हयन्यांत जाता. आयज पणजेक नितळ, प्रामाणीक, परोपकारी, स्वाभिमानी नगरसेवकाची गरज आसा. नागरिकांनी मतदान करतना स्वता परस आपल्या शाराचो विचार करून मतदान करचें.
पणजे शार हें पर्यटन थळ, फोंतेन्हासांतलीं घरां, झर, चर्च, मिरामार दर्यावेळ पळोवपाक संवसारभरांतले पर्यटक भेट दितात. मात शाराक समस्यांनी वेटोळो घाल्लो दिसता. आमी हें कितलो मेरेन सोंसचें हाचो विचार करपाचो वेळ आयला. एका काळार देशाचें संरक्षणमंत्रीपद सांबाळिल्ले, गोंयकारांचें लाडके नेतृत्व अर्थांत मनोहर गोपाळकृष्ण प्रभू पर्रीकार (पणजेकारांचे मोगाळ भाई) हांणी पणजेचें फुडारपण केल्लें. तांचे सारकें चारित्र्यसंपन्न, धडाडीचें नेतृत्व पणजी शाराक मेळ्ळें जाल्यारुच पणजेचो आनीक विकास शक्य आसा. फक्त स्मार्टसिटीचे धोल वाजोवप कांय जावचें ना. आतां कांय कडेन परत केल्लें काम फोडून नव्यान काम करप सुरू जालां. उदरगतीच्या कामांचें फिनिशिंग सारकें जावंक ना. रस्तो हें एकूच उदाहरण पुरो. फुटपाथ रुंद केल्यात. थंय सोबितीकरणाच्या नांवा खाला झाडां लायल्यांत. मात हे फुटपाथ रुंद जाल्ल्यान रस्तो अशीर जाला. परिणाम दोनूय वटेन गाडयो लायतकच येरादारी ठप्प जाता. स्मार्ट सिटी बशींच सुरळीत येरादारी करपाक मेळना. सांतिनेज नाल्या विशीं ना उलयिल्लेंच बरें. त्या वाठारांत भोंवून पळयात. दुर्गंध मारता. पावसाच्या दिसांनी तर पणजे बुडटा. उदक जिरपाक जमीनूच ना. मागीर कितें जातलें?
फाटलीं बरींच वर्सां पणजेंत समस्यांचेर समस्या पळोवपाक मेळटात. मुळाव्या सुविधांच्या नांवान तर शिमगोच चलता. ‘भ्रश्टाचार, चारित्र्याचेर आरोप जाल्ल्या फुडाऱ्यांक आमी लागीं पसून घेवचे नात. तांचेर कसले आरोप नात, तें सांगात?’ अशें ज्या फुडाऱ्यांचे बाबतींत सांगलें, तोच भाजपा आयज तांकां मानान पक्षांत घेवपाक लागला. जो भाजपा वांगडा गेलो तो सगल्या आरोपांतल्यान दोशमुक्त जालो. (व्हाॅशिंग मशीन) हो भाजपाचो राष्ट्रीय पॅटर्न. तो आमचे परशुरामभुमींतूय वापरला. विरोधी फुडाऱ्यांचेर सीबीआय, ईडी आनी आयकर विभागा कडल्यान प्रकरणां घालीं आनी सत्ते खातीर तांकां वांगडा घेतकच वा फोर्सान आपयतकच तांचे वयले सगले आरोप काडून तांकां दोशमुक्त केले.
कायदो आनी लोकशाय धाब्यार बसोवन भाजपान सामकें बुरशे राजकारण केलां. जाचो गोंय आनी देशांतले लोकशायेचेर खात्रेन परिणाम जातलो. ह्यो किळसवाण्या राजकारणाच्यो देखी भुरग्यांचे कायम मतींत उरतल्यो. हेंच आमचें पणजीकाराचें आनी गोंयकारांचें दुर्दैव. आपले बुद्दीन फक्त पणजे शाराच्या हिताचो विचार करपी नगरसेवकांची शाराक गरज आसा. बरेच मतदार, वावुरपी आनी ‘उप फुडारी’ आयज पयशां खातीर कांय थारावीक फुडाऱ्यां फाटल्यान नाचपाक लागल्यात. पयशें हें सर्वस्व न्हय हें आमकां केन्ना कळटलें?
कुटुंबशाही मुखार नाक घासपी नगरसेवकां परस पणजेकारांचे प्रस्न पोटतिडकेन मांडपी स्वाभिमानी नगरसेवकांची आयज गरज आसा. कारण तेच पणजेचो खरो विकास करपाक शकतात. पक्षनिश्ठा वा व्यक्तीनिश्ठा हाचे परस शाराचो सर्वांगी विकास, होच विचार मुखार घेवन फुडें सरपी फुडाऱ्याची, नगरसेवकाची आयज पणजेक गरज आसा. पणजेची संवसारीक दर्जो लाबिल्लें शार, अशी वळख निर्माण करपाची गरज आसा.
फॅमिलीराज सोंसून घेवचे नात, अशें गरड मारून पुराय देशाक तें पटोवन दिवपी भाजप आयज फॅमिली राज कशें मुखार व्हरता? लोक हें पळयतात. लोकांनी बारीक विचार करून म्हापालिका वेंचणुकेंत मतांचो अधिकार वापरपाक जाय. पणजी शार हें गोंयचें भूशण. पूण चारित्र्याचेर आरोप जाल्लें फुडारपण हें पणजे खातीर दुशण. आमी शाराक नितळ, चारित्र्यसंपन्न फुडारपण दिवपाक जाय. ही आमी जापसालदारकी. देखून नमळायेची विनवणी, पसंत करात जाका, जो तुमचे मदीं बदल घडयता, तुमचेर प्रभाव तर डोंबाऱ्याची कसरतूय घालता….
गजानन बा. नायक भाटकार
आल्त पर्वरी (बार्देश)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
