भांगरभूंय | प्रतिनिधी
चिंतन – 109
विधिनिषेध उर फोडी।
जंव नाहीं अनुभवगोडी॥
वाढे तळमळ उभयता।
नाहीं देखिलें अनुभवितां॥
तुकाराम महाराजाचो हो अभंग मनशाच्या भितरल्या सोदाचो आरसो. आमी कितलेय नेम, संस्कार आनी शिस्त पाळ्ळी तरी — भितरलें समाधान ना जाल्यार सगळें निरुपेगी दिसता. भायर सगलें वेवस्थीत आसलें तरी काळीज म्हणत रावता —
“म्हाका आनीक कितें तरी मेळपाक जाय, जें खऱ्या अर्थान म्हजें आसा!”
नेमाचो आदार आमकां दिका दिता, पूण सुखाचो अणभव आमकां मुखार व्हरता. हो अणभव फकत धर्मीक न्हय — तो जिवितांत खंयचेय सुवातेर लागू जाता.
कीर्तनसिंह कायलास हो नेपाळांतल्या सादारण घराण्यांतलो भुरगो. ल्हान आसतना ताणें एव्हरेस्टा कडेन पळोवन सपन पळयलें — “एक दीस हांव थंय पांय दवरतलों!”
सपन उंच आशिल्ल्यान ताची तयारी तितलीच खर आशिल्ली. नेम, शिस्त, व्यायाम, आहार— सगळेंच शंबर टक्के पाळ्ळें. पूण पयल्याच मोहिमेंत ताची कूड ताका आदार दिवंक शकली ना. हवामान वायट आशिल्लें, ताचो स्वास शिरकलो. ताका फाटीं सरचें पडलें.
ते रातीं ताका खूब वेदना जाली— “हांव सगलें बरोबर करतालों.. पूण अपेस कित्याक?”
तेन्ना कीर्तनाक कळ्ळें — दोंगर जिखपाचे धांवपळींत तो दोंगर अणभवपाकूच विसरिल्लो.
तेंगशेर वचपाचे ताकतिकेंत तेंगशे मेरेनच्या प्रवासाची खोस गायब जाल्ली.
मागीर ताणें थारायलें — “हांव जिखपाक वचना, जियेवंक वता!”
आनी जेन्ना तो परतून एव्हरेस्टा कडेन वचपाक लागलो तेन्ना ताच्या दोळ्यांत भंय नाशिल्लो —
अणभवाची तान आशिल्ली!
दर एका पावलांत स्वातंत्र्य, दर एका स्वासांत जिद्द, दर एका खिणाक आनंद…
आनी निमाणो तो तेंगशेर पावलो!
सकयल आयले उपरांत ताचीं उतरां — “Today, I felt the mountain. And it lifted me.”
(आयज हांवें दोंगराक जाणून घेतलो… आनी ताणें म्हाका उखलून व्हेलो!)
फकत नेम मनाक तोडटात, जाल्यार अणभव मन घडयतात.
कितलें काम हें म्हत्वाचें न्हय— म्हत्वाचें म्हणल्यार काम करतना तुमकां कशें दिसता.
तुमी कितली उपासना करतात ताचे वयल्यान न्हय — तुमी भक्तीची गोडी लागली काय हाचे वयल्यान शांती थारता.
तुमी कितले धांवतात ताणें येस न्हय — दर एका पावलांत खोस आसा काय ना हाचे वयल्यान थारता जीण.
आयज आमी स्वताक विचारुया — हांव फकत नेम पाळटां? वा जिणेची गोडसाण अणभवतां?
कारण निमाणें…
अणभव हो भितरलो देव. जेन्ना ताचो आमकां स्पर्श करता तेन्ना जिविताचें दरेक पान सोबीत जाता!
– हभप देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
