भांगरभूंय | प्रतिनिधी
पणजी : गोंयच्या घुवळे वखदांच्या काळ्या बाजारांतल्यान जोडिल्ले अवैध संपत्तीचेर अंमलबजावणी संचालनालयान आतां मेरेन सगल्यांत व्हड कारवाय केल्या. पणजी विभागीय कार्यालयान घुवळे वखदांचे तस्करी कडेन संबंदीत मनी लॉंड्रिंग प्रकरणांत सुमार ७.१७ कोटी रुपयांची स्थावर मालमत्ता तात्पुरती जप्त केल्या. नार्कोटिक ड्रग्ज अँड सायकोट्रोपिक सबस्टन्सेस (NDPS) कायद्या खाला नोंद केल्ल्या गुन्यांवांतल्यान ही कारवाय केल्ल्यान, हाका लागून गोंयच्या घुवळे वखदां माफियांचे अर्थीक लुकसाण जालां.
ह्या प्रकरणाचीं पाळां मुळां मार्च २०२१ त नार्कोटिक्स कंट्रोल ब्युरोन नोंद केल्ल्या गुन्यांवांत सांपडटात. उगोचुकवू सोलोमन उबाबुको, इन्फिनिटी जॉन ऊर्फ डेव्हिड आनी प्रसाद वाळके हांचे आड घुवळे वखदांचे वेवसायीक विक्रेचो ठपको दवरिल्लो. हणजूण आनी आसगांव वाठारांतल्या छाप्यांनी एलएसडी, कोकेन, चरस आनी गांजो अशे घातकी घुवळे वखदां जप्त केल्लीं. विशेश म्हळ्यार, वाळके हांच्या घरांतल्यान एलएसडी जप्त केल्ले. वाळके हो ह्या वेवसायांतलो सरायत आशिल्ल्यान, ह्यान पयलीं २०१८त एनसीबीन जाल्यार २०२३त गोंय पुलिसांच्या घुवळे वखदां विरोधी पंगडान ताका एमडीएमए, एक्स्टसी पावडर आनी हायड्रोपोनिक वीड अश्या गुन्यांवांत अटक केल्ली. सध्या तो न्यायालयीन बंदखणींत आसा.
मजगतीं, ईडीच्या तपासांत धक्को दिवपी म्हायती मुखार आयली. घुवळे वखदांचे तस्करींतल्यान मेळिल्लो पयसो वाळके आनी ताच्या बायलेच्या नांवार आशिल्ल्या विवीध बँकेच्या खात्यांत खर स्वरूपांत जमा केलो. हो काळो पयसो बँकिंग वेवस्थेंत फिरोवन तांतल्यान बेकायदेशीरपणान मालमत्ता खरेदी केली. ईडीन जप्त केल्ले मालमत्तेंत आसगांव, बार्देसच्या तीन इमारतींचो आसपाव आसा. हातूंत एक तीनमजली निवासी बंगलो आनी दोन दुमजली घरांचो आसपाव आशिल्ल्यान ही मालमत्ता गुन्यांवांतल्यान मेळिल्ल्या उत्पन्नांतल्यान खरेदी केल्ल्याचें तपासांत स्पश्ट जालें.
केंद्राच्या ‘नशामुक्त भारत अभियाना’क बळ दिवपा खातीर अंमलबजावणी संचालनालयान आपली कारवाय अदीक खर केल्या. फकत घुवळे वखदां जप्त करून तस्करी थारचीना. जाल्यार हे तस्करीचें मूळ आशिल्ल्या अर्थीक स्रोतांचेर प्रहार करप गरजेचें आशिल्ल्याचें ईडीन म्हणलें. घुवळे वखदांच्या वेवसायांतल्यान कमयल्ले संपत्तीचेर जप्तीची कारवाय करून ईडीन अशा गुन्यांवकारांक बरोच बसपी संदेश दिला. ह्या प्रकरणाचो खोल तपास अजूनय सुरू आशिल्ल्यान, हे तस्करींतल्यान लाव मेळपी हेर लावार्थी आनी तांकां मजत करपी सुत्रधारांचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
