भांगरभूंय | प्रतिनिधी
भारताचो ग्रॅण्डमास्टर आर प्रज्ञानंदाक पांचवे फेरयेंत चीनाच्या क्युआंग लिएम ली आड हार घेवची पडली. हे हारीक लागून एफटीएक्स क्रिप्टो करंड बुद्दीबळ सर्तींत ताची चालू आशिल्ली जैताची धांव थांबली.
चीनाच्या खेळगड्यान एकवटेन जाल्ले मॅचींत भारताच्या ग्रॅण्डमास्टराक 2.5-0.5 अशा फरकान हारयलो. पयलो डाव बादाबाद उरल्या उपरांत चीनाच्या खेळगड्यान फुडले दोनूय डाव जिखले.
संवसारीक क्रमवारींत पयले सुवातेर आशिल्ल्या मॅग्नस कार्लसनाक लेगीत पोलंडाच्या यान क्रिस्तोफ डुडा आड टायब्रेकरांत 2-4 फरकान हार घेवची पडली. दोगां मदली चार डावांची मॅच 2-2 अशी बादाबाद उरिल्ली. हारून लेगीत कार्लसन पांचवे फेरये उपरांत 13 गुणां सयत पयले सुवातेर कायम आसा. तो प्रज्ञानंदा परस एका गुणान मुखार आसा.
भारताच्या 17 वर्सां पिरायेच्या प्रज्ञानंदान सर्तीक उत्कृश्ठ सुरवात करतना पयल्यो चार मॅची जिखिल्ल्यो. ताणें संवसारीक क्रमवारींत चवथे सुवातेर आशिल्ल्या अलीरेजा फिरौजा, अनीश गिरी, लॅव्हॉन अॅरोनियन आनी हेन्स निमॅन हांकां हारयिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
