भांगरभूंय | प्रतिनिधी
येवपी २१ एप्रिलाक जातली शिरगांव लयराईची जात्रा
पणजी : शिरगांवचे लयराई देवीचे जात्रेंत भावीक तशेंच लोकांची सुरक्षा आनी गर्दीचेर नियंत्रण दवरपा खातीर उपाययेवजण्यो तशेंच गर्दी वेवस्थापनाचो आराखडो सादर करपाचे निर्देश गोंयांतल्या मुंबय उच्च न्यायालयान दिल्यात. हो आराखडो सप्तका भितर सादर करचो पडटलो. अंदूं २१ एप्रिलाक शिरगांवची वर्सुकी जात्रा जातली.
फाटल्या वर्सा शिरगांवचे जात्रेंत खेटाखेट जावन ६ भाविकांक मरण आयिल्लें, जाल्यार ८० परस चड लोक जखमी जाल्ले. हे भिरांकूळ घडणुके उपरांत सरकारान चवकशी समिती स्थापन केली. चवकशी समितीन अहवाल सादर केला. शिरगांव जात्रेसंबंदी गणेश गांवकार आनी हेरांचे याचिकेचेर सुनावणी जाली. ह्या वेळार न्यायाधीश सुमन श्याम आनी अमित जमसंदेकर हांणी हे निर्देश दिले. गर्दीचो वेवस्थापन आराखडो सरकाराक ६ मार्च मेरेन सादर करचो पडटलो. हे याचिकेचेर फुडली सुनावणी १० मार्चाक जातली.
शिरगांव जात्रे वेळार अपघात वा दुर्घटणा जावची न्हय म्हूण फावो ते उपाय येवजण्यो सरकारान घेतल्या. आपत्ती वेवस्थापन तशेंच सुरक्षेविशीं उपाययेवजण्यो करपी कामां सुरू आसा, अशें सुनावणे वेळार एडव्होकेट जनरल देवीदास पांगम हांणी सरकारची बाजू मांडटना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
