भांगरभूंय | प्रतिनिधी
पणजी : म्हापालिका वेंचणुके खातीर अर्ज फाटीं घेवपाची आयज निमाणी तारीख. बाबुश मोन्सेरात हाचो पीए तशेंच पॅनलाचे समर्थक आमच्या पॅनलांतल्या उमेदवारांक अर्ज फाटीं घेवपा खातीर काल रातच्यान चेंपण हाडटात. हे विशीं राज्य वेंचणूक आयोगा कडेन कागाळ करतले. ही वेंचणूक मेकळ्या वातावरणांत जावपाक मुख्यमंत्र्यान बाबुश मोन्सेरात हांचो राजिनामो घेवप गरजेचें आशिल्ल्याची मागणी दत्तप्रसाद नायक हांणी केली. बिरेस्तारा तांणी माध्यमां कडेन संवाद सादलो.
दत्तप्रसाद हांणी सांगलें : मोन्सेरात पॅनलांतले उमेदवार आमच्या उमेदवारांक अर्ज फाटीं घेवपाची धमकी दितात. हाचें कॉल रेकॉर्डिंग, स्क्रीन शॉट आमचे कडेन आसात. आमच्या एका उमेदवाराचेर १२ वरां चेंपण घालां. ताची आवय फाटल्या कितल्याशाच दिसां सावन हॉस्पिटलांत आसा. मात विरोधी पॅनलांतल्या लोकांनी तिची केन्नाच वासपूस करूंक ना. मात अचकीत आयज सकाळीं बाबुश हांगा येवन गेले. बाबुश पॅनल वेंचणुकेंत सामकें सकयले पातळेर वचून काम करतात.
काल रातीं प्रभाग नंबर ९ तले उमेदवार सुरेंद्र फुर्तादो हांकां ऑफर दिवपाचो यत्न जालो. तांचो पूत प्रभाग नंबर ७ तल्यान फाटीं सरल्यार प्रभाग ९ तल्यान कबीर पिंटो फाटीं सरतले, अशें सांगलें. मात आमचे उमेदवार असल्या बुरश्या राजकारणाक बळी पडचे नात. ह्यान पयलीं आमी सगल्यो ३० सुवातो सहज जिखतले असो बाबुश पॅनलाचो आविर्भाव आशिल्लो. मात तें शक्य जावचें ना हें कळिल्ल्यान आमच्या उमेदवारांचेर चेंपण हाडपाचे यत्न नेटान चालू आसात. हाका लागून येणावळ खात्याच्या यंत्रणांचो वापर जाल्ल्यान बाबुश हांणी राजिनामो दिवप गरजेचें आशिल्ल्याचें नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
