भांगरभूंय | प्रतिनिधी
हिप्पी हें उतर आमच्या भुरगेपणातूच गोंयांत चड नेटान घोळटालें. हिप्पी म्हळ्यार दर्यावेळेर हेडपी, न्हिदपी, सनबाथ घेवंक रेंवेचेर लोडेवपी, भारतांत गोयांत येवन बेधुंद जीण जगपी एक विदेशी गोरी जमात. बॅगपॅक प्रवासी अशेंय तांकां म्हणटाले.
तात्पर्य – हालींच एक बोधकथा विडियोचेर पळेली. नामनेचे वकील फली नरीमन सांगताले. कांय लेखकांक शंख घोष, शंकर शेष हे कोण असो प्रस्न पडटा म्हणून नरीमन कोण हें सांगलें.
विडीयोचेर आपले आवडीची कथा ताणें परत सांगली. एक धाकटुलें हेलिकॉप्टर उड्डाण घेवन वतालें खंय. तातूंत दलाई लामा बशिल्लो. बिल गेट्स बशिल्लो. ऐन त्या वक्तार हेलिकॉप्टरांत एक हिप्पी रिगिल्लो. पायलट धरून चार.
घब्ब ठो करून हेलिकॉप्टरांत खंय तरी स्फोट जालो. मोट्टो आवाज. धुंवराच्या लोटांतल्यान पायलट सिटावेल्यान उठून भायर आयलो. ताणें सांगलें – कितें जालां कळना. पूण हॅलिकॉप्टर सकयल देंवपाक लागलां. केन्नाय खंयूय कोसळूं येता. तीनूच पॅराशूट्स आसात. एक सत्री घेवन हांव उडकी मारतां. ताणें पॅराशूट घेवन उडकी मारली. बील गेट्स दोगांक सांगपाक लागलो. हांवें इतली संपदा, आस्पत कश्ट करून पुंजायल्या. जगांतलो हांव श्रीमंत मनीस. हुशार मनीस. कर्तबगार. हांव एक पॅराशूट घेवन देंवता सकयल. म्हाका जगूंक जाय. पयशे गरिबांक दिवंक जाय. एक सत्री घेवन ताणें उडकी मारली.
दोग उरले. दलाय लामा आनी तो हिप्पी. लामान ताका समजायलो. हांव खूब व्हडली बरी शांतीमय परिपूर्ण जीण जगलां. साधना मोक्षाच्या मार्गार वयर पावलां. तुका व्हडली जीवनयात्रा आसा. एक पॅराशूट घेवन तूं देंव. हांव हेलिकॉप्टर खंय पावता थंय वतां. तो हिप्पी दलाय लामाक हांसत सांगूंक लागलो. त्या बिल गेट्सान आबूज जावन म्हजें बॅगपॅक, पॅराशूट समजून वेंगायलें आनी उडकी मारली. घे हें. एक तुका एक म्हाका. कमॉन.
कला अकादमींतल्या दोन वादग्रस्त अधिकाऱ्यांनी बॅग घेवन उडकी मारल्या. कर्मांनी भरिल्लें बॅगपॅक. नाक मारून घेवपाक. हेलिकॉप्टर अकादमीचें आपली दिशा, gyration शेणोवन, जीपीएस वगडावन क्रॅश जावपाच्या मार्गार आसा.
कला अकादमींतली वेगवेगळ्या तरेची घाण वर्सांसंकीनी साचत आसा. फाटलीं 50 वर्सां आमी नाक दामून धरून लागींच्यान ती पळेल्या. कालचीं पयरचीं बाळकां कोंकणी आमचीच म्हणून उब्बीं उसळूं मागीर. बाश्कळ उलोवपी एका कथीत रंगकर्मी बाळकाक पयर सांगलें – तूं जल्मूंक नासलो, तेन्नाच्यान आमी बरयतात.
पन्नासावी कोंकणी नाट्य सर्त जाली. हे सर्तींत निकाल जावपा वेळार खवदोळ जालो. आदींच तो धुंवर सुरू जाल्लो. सर्त चालू आसतना एक नाटक, मिझरी ह्या नाटकाची थेट कॉपी अशें कितल्याशाच प्रेक्षकांनी, म्हज्या मित्रांनी म्हाका ती कादंबरी, फिल्माच्यो विडीयो फिती हे पुरावे दिवन दाखोवन दिलें. शॉक जालो. कॉपी मारपाच्या धाडसाचो. मागीर पयलें नाटक आयिल्लें ताचे वेल्यानूय वाद जालो. तशेंच नाटक मराठीत आसा, असो एक युक्तिवाद एका ज्येष्ठ रंगसाधकान मांडलो. मिझरी हें सर्वांगान कॉपी अशें सांगत एक लेख आयलो. ताचेरूय बचाव करपी आवाज ना. मागीर हेर कांय तज्ञांनी उस्तवारी करून आदल्या कांय वर्सांनी ह्याच मनशान कॉपी मारिल्ल्या हेर इंग्लीश नाटकांचे, विडीयोंचे, कथानकांचे दाखले दिले. पन्नासाव्या वर्सा सर्तीच्यो ह्यो विदर्णा अश्यो जाल्यो.
परीक्षकांची निवड एकलोच वादग्रस्त अधिकारी करता. एकाधिकारशाय. कोंकणी भाशेचो, उच्चारांचो, वाक्प्रचार म्हणींचो गंध नाशिल्ले परीक्षक घालतकच कितें जातलें? जोर रडटा पेजेक अशी म्हण जर आयली जाल्यार ती असल्या मराठी उलोवपी आनी कोंकणी वाचन, कोंकणी उलोवप, कोंकणी अभिनय, लेखन कितेंच नकळो आशिल्ल्या परीक्षकांक कशे कळटलें? कोंकणीची फकांडां खेबाडां कित्याक? कोंकणी संस्था आवाज कित्याक काडिनात?
कोंकणी सर्तीचीं 50 वर्सां मनोवपाक कार्यावळी करपाक एक समिती कला अकादमीन घडयल्या. अजून कसलोच आवाज ना. आवाज एकूच जाला घूम्म करून. बाटल्यो, पयशे लांच दिवन आपणाक पयलेंच इनाम दी म्हूण फाटीक लागिल्ल्यांचें कथित भ्रश्टाचारी कर्तुब. आयकलां ते प्रमाण हे समितींत एक वांगडी आसा, जाचो कोंकणी रंगमाचये कडेन काडयेचो संबंद ना. तो घरा मराठी उलयता. माची गाजोवपी घे म्हूण नट, नटयो, तंत्रज्ञ आसतना हीं फाजिलपणां आनी दादागिरी कसली?
सद्या कला अकादमीचें पाळणें लोकांच्या प्रतिक्रियांनी धोलता, हालता म्हूण भ्रष्टाचाऱ्यांचेर एकाद्री चवकशी बी जायत. शो कॉज नोटीस अधिकाऱ्यांक दिल्या म्हूण आयकलां. पूण सबंद नाटक कॉपी मारतात तेन्ना त्या कथीत साहित्यचोर लेखकाचेर कसली कारवाय केली? म्हणजे फुडल्या वर्साय 51 व्या सर्तींत हीच कॉपी विकृती चालू दवरात ही वृत्ती आसूंये. अंधेर नगरी चौपट राजा अशी हिंदीत एक म्हण आसा. साहित्यचोरी करतल्याचेर आनी संस्थेचेर तीन वर्सां बंदी घालूंक जाय. 50 व्या कोंकणी नाट्य सर्तींतूय कितल्याशाच मराठी नाटकांचो अणकार सादर जालो. कांय जाण मूळ लेखकाचें नांव सांगतात ही बरी गजाल. पूण कांय जाण त्या लेखकाची रीतसर लेखी परवानगी घेनात. पोरूं एका मराठी नाटककारान एके संस्थेच्या जाळवणदारांक आपलें नाटक सर्तींत घालां हें कळटकच फोन करून उजरायले आनी नाटक फाटीं घेयात अशें शिटकायलें. तो कायदेशीर कारवाय करपाक तयार जाल्लो. मागीर हे संस्थेन तें नाटक फाटीं घेतलें. कला अकादमी छिद्रांनी भरल्या. प्रवेशिका घेतात तेन्नाच अणकारीत संहिता आसल्यार मूळ लेखकाची परवानगी दाखयात हो आग्रो ना. मूळ आसूं वा अणकारीत आसूं, नाटकांची संहिता खूब आदीं घेनात. नाटका पयलीं घेतात, जी एक आळसाय. सेन्सॉरशीप समिती अकादमीकडे ना. साहित्यचौर्य वा मौलीक नाटकांत चारित्र्यहनन बी आसत जाल्यार कळपाचें कशें? नाटक जातकच? चिखल मारात, बदनामी करात, कोण काही करो ही वृत्ती.
अ आनी ब मराठी नाट्य सर्त, कोंकणी नाटक सर्त, स्कूल, कॉलेज एकांकी सर्त वेवस्थीतपणान करपाची वान्सा जाय. परीक्षकांची वळेरी आसा? सर्तीची नेमावळ अचूक आनी फूल-प्रूफ आसा? वर्सां आदली पुस्तिका आळसायेन तशीच दिवप. खोंटांनी चुको आनी छिद्रां.
अकादेमीचें हेलीकॉप्टर क्रॅश जांवक फावना. ते खातीर दोशींचेर चवकशी करून कारवाय जावची.
मुकेश थळी
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
